თბილისი, 19 ივლისი — Sputnik. მმართველი პარტია „ქართული ოცნების“ ერთ-ერთმა ლიდერმა, მამუკა მდინარაძემ ევროპარლამენტის ახალ განცხადებას, რომელიც 19 ივლისისთვის დაგეგმილი საპროტესტო აქციის წინ გაჟღერდა, შანტაჟისა და ოპოზიციის დახმარების მცდელობა უწოდა.
სოციალურ ქსელში ევროპარლამენტის გვერდზე გამოქვეყნდა განცხადება, სადაც ნათქვამია რომ „საქართველო ვერ შეძლებს ევროკავშირში გაწევრიანებას მანამ, სანამ მისი მთავრობა ავტორიტარულ კურსს არ შეიცვლის“. ევროპარლამენტი „მხარს უჭერს ქართველ ხალხს“, არ ცნობს საქართველოს ამჟამინდელ მთავრობას და აცხადებს, რომ საქართველოს ევროკავშირში გაწევრიანება ფაქტობრივად შეჩერებულია „სამართლიანი არჩევნების“ ჩატარებამდე.
„მხოლოდ ვიზალიბერალიზაციით შანტაჟი, როგორც ჩანს, არ ჭრის, დამატებითი ზომებია საჭირო ქართველი ხალხის წინააღმდეგ, რომელსაც საკუთარ თავზე უარი არასდროს უთქვამს - ყველას მოუწევს ამასთან შეგუება! დღეს რადიკალებს აქცია აქვთ დაანონსებული, რომელიც ორკვირიანი მზადების მიუხედავად ფაქტობრივად ჩავარდნილი იყო და მის „დასაბუსტად” რაღაც იყო საჭირო. რა საოცარი დამთხვევაა ეს განცხადება“, - წერს მდინარაძე.
მანამდე ევროკომისია დაუკავშირდა საქართველოს საგარეო საქმეთა სამინისტროს და გააფრთხილა, რომ თუ საქართველო არ შეასრულებს რიგ მოთხოვნებს, რომლებიც ძირითადად კანონმდებლობას ეხება, საქართველოს მოქალაქეებისთვის უვიზო რეჟიმი შეჩერდება.
იდეას, რომ ევროპარლამენტის განცხადება საპროტესტო აქციას უკავშირდება, ასევე იზიარებს „ქართული ოცნების“ კიდევ ერთი წევრი, რატი იონათამიშვილი.
„დღეს ხომ რადიკალების აქციაა და ამ ჩავარდნილ აქციას რომ სული შეუბერონ, უქმე დღეს უნდათ სამსახურში გამოიყვანონ აგენტურა“, - დაწერა იონათამიშვილმა სოციალურ ქსელში.
ზოგიერთმა ოპოზიციურმა პარტიამ და სამოქალაქო საზოგადოებამ შაბათს გამართეს აქცია, სადაც პირდაპირ განაცხადეს, რომ არ აპირებენ 4 ოქტომბერს ადგილობრივი თვითმმართველობის არჩევნებში მონაწილეობის მიღებას ბოიკოტს და კვლავაც მოითხოვეს ვადამდელი საპარლამენტო არჩევნების ჩატარება.
შემდეგმა პარტიებმა უკვე განაცხადეს მონაწილეობაზე უარის თქმის შესახებ: „თავისუფლების მოედანი“, „ევროპული საქართველო“, „ერთიანი ნაციონალური მოძრაობა“, „სტრატეგია აღმაშენებელი“, „ახალი“, „გირჩი - მეტი თავისუფლება“, „დროა“ და „ფედერალისტები“.
სანამ ეს პარტიები ბოიკოტს უცხადებენ პროცესს, სხვები აქტიური ბრძოლისთვის ემზადებიან. ამრიგად, ყოფილი პრემიერ-მინისტრის, გიორგი გახარიას პარტიამ „საქართველოსთვის“ და პარტია „ლელო - ძლიერმა საქართველომ“ უკვე მოაწერეს ხელი თანამშრომლობის მემორანდუმს მომავალ არჩევნებში და საერთო კანდიდატის წარდგენის შესაძლებლობას განიხილავენ.