თბილისი, 16 აპრილი – Sputnik. ოპოზიციური პარტიების ნახევარი სერიოზულად განიხილავს ადგილობრივ თვითმმართველობის არჩევნებში მონაწილეობას, რომელიც საქართველოში 2025 წლის შემოდგომაზე გაიმართება, - ამის შესახებ ოპოზიციური პარტია „კოალიცია ცვლილებისთვის“ ერთ-ერთმა ლიდერმა ნიკა მელიამ ტელეკომპანია „ტვ პირველის“ ეთერში განაცხადა.
2025 წლის ოქტომბერში 64 ქალაქსა და რაიონში მერებისა და ადგილობრივი თვითმმართველი ორგანოების (საკრებულოს) დეპუტატების არჩევნები გაიმართება. ამ დროისთვის ოპოზიცია არჩევნებში მონაწილეობის შესახებ განცხადებებისგან თავს იკავებს.
„ნახევარი ოპოზიციური პარტიები ამ წუთის მდგომარეობით სერიოზულად ფიქრობენ ადგილობრივ არჩევნებზე გასვლას... ყველაფერს ვაკეთებთ ჩვენ, მათ შორის მეც, რომ ეს არ მოხდეს“, - განაცხადა მელიამ „ტვ პირველის“ ეთერში.
ნიკა მელიამ ასევე განმარტა, რომ ოპოზიციაში ბევრისგან არ არსებობს პასუხი კითხვაზე, თუ არაფერი შეიცვალა, გადიან თუ არა ადგილობრივ არჩევნებზე.
„რაც უნდა ძალიან პატივს ვცემდე ნებისმიერ კოლეგა პოლიტიკოსს, ბოლომდე ვერ ვენდობი, ვიდრე ჩემ მიერ დასმულ კითხვაზე, თუ არაფერი შეიცვალა, გავდივართ თუ არა ადგილობრივ არჩევნებზე, პასუხი არ არსებობს. ამ კითხვას როცა სვამ და პასუხი არ არსებობს, დიახ, ეს მაფიქრებინებს, რომ ბევრი ფიქრობს. სხვა შემთხვევაში, წინ რა უდგას ამ კითხვაზე პასუხის გაცემას?“ – აღნიშნა ნიკა მელიამ.
მისი თქმით, აპრილში ყველამ კარგად „იგემა“ საპარლამენტო ბოიკოტის ფასი, რამხელა უპირატესობა აქვს ახლა, ამ უთანასწორო ბრძოლაში ქართველ ხალხს.
„ეჭვი არ მეპარება, რომ მაშინ საპარლამენტო ბოიკოტი თუ არ დაირღვეოდა, ის აბსოლუტურად წარმოუდგენელი პრეცედენტი ადგილობრივ არჩევნებზე როდესაც 43-პროცენტიანი ზღვარი მოიფიქრეს და ამაზე დაიყოლიეს პარტიები, ვერ შედგებოდა და ამ ქვეყანაში ჩატარდებოდა ახალი საპარლამენტო არჩევნები“, – განაცხადა ნიკა მელიამ.
ამასთან მელია მიიჩნევს, რომ ოპოზიციამ უნდა გაითავისოს 2020-2021 წლების გამოცდილება, როგორც გაკვეთილი. 2021 წლის თვითმმართველობის არჩევნების მთავარი ინტრიგა იყო, შეძლებდა თუ არა „ქართული ოცნება“ ამომღეცველთა ხმების 43%-ის მოპოვებას.
„რომ არ ყოფილიყო საპარლამენტო ბოიკოტი, ერთი ადამიანიც არ იდგებოდა, დღემდე ხომ საერთოდ არავინ არ იდგებოდა, მაგრამ მაქსიმუმ ერთი კვირა გაეპროტესტებინა ვინმეს, თუ ოპოზიციური პარტიები ბოიკოტს არ მიმართავდნენ“, - აღნიშნა მელიამ.
ოპოზიცია პარლამენტში ევროპული საბჭოს პრეზიდენტ შარლ მიშელის შუამავლობით, ხელისუფლებასთან 2021 წლის 19 აპრილის შეთანხმების გაფორმებიდან რამდენიმე თვეში შევიდა.
ამ შეთანხმების მიხედვით, 2021 წლის შემოდგომაზე ადგილობრივი თვითმმართველობის არჩევნები ერთგვარ რეფერენდუმად იქცა. თუ მმართველი პარტია პროპორციულ ნაწილში ხმების 43%-ზე მეტს ვერ მიიღებდა, რიგგარეშე საპარლამენტო არჩევნები უნდა დანიშნულიყო. „ქართულმა ოცნებამ“ მაშინ ამომრჩეველთა ხმების 46,7% მიიღო.
„კოალიცია ცვლილებებისთვის“ იმ სამ ოპოზიციურ პარტიას შორისაა, რომელიც პარლამენტში 2024 წლის 26 ოქტომბრის არჩევნების შემდეგ მოხვდა, მაგრამ უარი თქვა მმართველი პარტიის გამარჯვების აღიარებაზე და ახალი მოწვევის საკანონმდებლო ორგანოში მუშაობაზე. ყველა ამ პარტიას მმართველი პარტია „რადიკალურ ოპოზიციას“ და „კოლექტიურ ნაციონალურ მოძრაობას“ უწოდებს.
თვითმმართველობის არჩევნები ყველაზე მასშტაბურია ქვეყანაში - ყველა ქალაქისა და რაიონის მოსახლეობა ცალ-ცალკე ადგილობრივ ხელმძღვანელობას ირჩევს.
საკრებულოს ყველა სათათბირო ორგანოს პროპორციულ არჩევნებზე გამსვლელი ბარიერი 4%-ია, მერის არჩევნებზე - ხმების 50%-ზე მეტი. 2024 წლის საპარლამენტო არჩევნების შედეგების მიხედვით, ბარიერის გადალახვის შანსი მხოლოდ შემდეგ პარტიებს აქვთ: „ქართული ოცნება – დემოკრატიული საქართველო“, „კოალიცია ცვლილებისთვის“, „ერთიანობა – ნაციონალური მოძრაობა“, „ლელო საქართველოსთვის“ და „საქართველოსთვის“.
დანარჩენმა პარტიებმა, თუნდაც ქვეყნის მასშტაბით, ამომრჩეველთა 3%-ის მხარდაჭერაც კი ვერ მოიპოვეს. მათ შორის არის პარტია „ახალი პოლიტიკური ცენტრი – გირჩი", რომელმაც ერთადერთმა განაცხადა, რომ ადგილობრივი თვითმმართველობის არჩევნებში მიიღებს მონაწილეობას.
ადგილობრივი თვითმმართველობის არჩევნები საპარლამენტო არჩევნებისგან იმით განსხვავდება, რომ თითოეულ რაიონში შედეგები ცალ-ცალკე ითვლება. ამრიგად, მცირე პარტიების უმეტესობას არ ეყოფა რესურსი კონკრეტულ რაიონში გასამარჯვებლად.
აღსანიშნავია, რომ საპარლამენტო არჩევნების შედეგების თანახმად, მმართველი პარტია ოპოზიციასთან ყველა დიდ ქალაქში დამარცხდა, მათ შორის თბილისში, ქუთაისში, ბათუმსა და რუსთავში.