თბილისი, 4 აპრილი – Sputnik. აშშ-ის ჰელსინკის კომისიის საქმე არ არის, ვისთან ითანამშრომლებს დამოუკიდებელი საქართველო ანაკლიის პირველი ღრმაწყლოვანი პორტის მშენებლობის პროექტზე, განუცხადა ჟურნალისტებს თბილისის მერმა, „ქართული ოცნების“ გენმდივანმა კახა კალაძემ.
ის გამოეხმაურა განცხადებას, სადაც ჰელსინკის კომისიის წევრები გამოთქვამენ შეშფოთებას მთავრობის გადაწყვეტილების გამო, გადასცეს ანაკლიის პორტზე კონტროლი აშშ-ის მიერ დასანქცირებულ კონგლომერატს, რომელსაც მხარს ჩინეთის კომუნისტური პარტია უჭერს.
„საქართველო არის დამოუკიდებელი ქვეყანა, სუვერენული სახელმწიფო და თვითონ გადაწყვეტს, ვისთან ჰქონდეს ურთიერთობები, რა ტიპის ურთიერთობები ჰქონდეს და რა სავაჭრო ურთიერთობები. ეს არ არის ჰელსინკის კომისიის საქმე“, - განაცხადა კახა კალაძემ.
რაც შეეხება ურთიერთობების გაუმჯობესებას აშშ-თან, მერის თქმით, მთავრობისთვის პრიორიტეტულია ქართველი ხალხი.
„ჩვენთვის ყველაზე მთავარი არის ქართველი ხალხი, ჩვენი სამშობლო და ჩვენი ქვეყნის ინტერესები. მერე არის ყველაფერი დანარჩენი, სხვა ქვეყნებთან ურთიერთობები. რა არის ამაში გაუგებარი“, - აღნიშნა კალაძემ.
ჩინურ-სინგაპურული კონსორციუმი China Communications Construction Company Limited (ჩინეთი) & China Harbour Investment Pte. Ltd. (სინგაპური) ერთერთი კომპანია, რომელმაც ანაკლიის პორტის განვითარებაში ინვესტირებით დაინტერესება გამოხატა. საქართველოს მთავრობა მასთან ხელშეკრულებას 2025 წლის ზაფხულამდე გააფორმებს. ანაკლიის პორტის 51%-ის მფლობელი იქნება სახელმწიფო, დანარჩენ წილს კი კერძო ინვესტორი მიიღებს.
„ჰელსინკის კომისიის“ წევრები (აშშ-ს ორივე პარტიის - დემოკრატიული და რესპუბლიკური) განცხადებაში შეშფოთებას გამოთქვამენ “ქართული ოცნების” გადაწყვეტილებასთან დაკავშირებით, რომ ანაკლიის ღრმაწყლოვანი პორტი „ჩააბაროს ჩინეთის კომუნისტურის პარტიის მიერ მხარდაჭერილ, აშშ-ის მიერ დასანქცირებულ კონგლომერატს“.
„ამ გარიგებაში ჩართულ დეველოპერებს, მათ შორის “ჩინეთის კომუნიკაციების სამშენებლო კომპანიას” აქვთ ინფრასტრუქტურის განვითარების პროექტების მასპინძელი ქვეყნების ექსპლუატაციისთვისა და დესტაბილიზაციისთვის გამოყენებისა, და ამ ქვეყნების ჩინეთზე დამოკიდებულების გაღრმავების ისტორია“, - აღნიშნულია განცხადებაში.
განცხადებაში ასევე ნათქვამია, რომ რუსეთთან კოლაბორაციით ჩინეთის მზარდი ჩართულობა შავ ზღვაში რეგიონს ნაკლებად უსაფრთხოს ხდის და ზღუდავს თავისუფალ ვაჭრობასა და კომერციას.
„ამ გარიგების წინ წასვლით “ქართული ოცნება” უფრო დიდი საფრთხის ქვეშ დააყენებს თავისი ქვეყნის დემოკრატიულ ტრაექტორიას და შესაძლებლობას, განსაზღვროს საკუთარი ეკონომიკური მომავალი“, - ნათქვამია განცხადებაში.
მათი თქმით, ჩინურ კონსორციუმთან შეთანხმების გაფორმებით მთავრობა კიდევ დიდ საფრთხეში ჩააგდებს ქვეყნის დემოკრატიულ გზას და მის უნარს, განსაზღვროს საკუთარი ეკონომიკური განვითარება.
„მოვუწოდებთ “ქართულ ოცნებას”, გადახედოს ამ გადაწყვეტილებას და შეაფასოს წინადადებები თავისი კრიტიკულად მნიშვნელოვანი ინფრასტრუქტურის სამართლიანად და გამჭვირვალედ გასავითარებლად”, - ნათქვამია "ჰელსინკის კომისიის" განცხადებაში.
საქართველო და დასავლეთი
საქართველოს პარტნიორობა მთელ რიგ დასავლურ ქვეყანასთან გაუარესდა ქვეყანაში „უცხოური გავლენის გამჭვირვალობის შესახებ" კანონის მიღების შემდეგ. ურთიერთობები კიდევ უფრო გაუარესდა "ოჯახური ღირებულებებისა და არასრულწლოვანთა დაცვის შესახებ" კანონის მიღების შემდეგაც, რომელიც ლგბტ-პროპაგანდას კრძალავს.
ევროკავშირმა შეაჩერა საქართველოში მაღალი დონის ვიზიტები და ყველა მაღალი დონის შეხვედრა საქართველოს ხელისუფლების წარმომადგენლებთან ბრიუსელში. საქართველოს მთავრობას მრავალმილიონიანი ფინანსური დახმარება შეუჩერდა.
შტატებმა ასევე შეაჩერეს საქართველოსთან სტრატეგიული პარტნიორობა, გაურკვეველი დროით გადადეს სამხედრო სწავლება "ღირსეული პარტნიორი 2024" (Noble Partner) და შეაჩერეს მთავრობისთვის განკუთვნილი დახმარება 95 მლნ დოლარის ოდენობით.
აშშ-მ „დემოკრატიისთვის ძირის გამოთხრისთვის" საქართველოს 100-ზე მეტ მოქალაქეს, მათ შორის მინისტრებს, დეპუტატებსა და ძალოვანებს სავიზო შეზღუდვები დაუწესა, გარდა ამისა დააწესა სანქციები "ქართული ოცნების" საპატიო თავმჯდომარე ბიძინა ივანიშვილის წინააღმდეგ.
ევროკავშირის ხუთმა ქვეყანამ, ასევე დიდმა ბრიტანეთმა, შეერთებულმა შტატებმა და უკრაინამ საქართველოს ხელისუფლების 300-ზე მეტ წარმომადგენელს სავიზო სანქციები დაუწესა.