თბილისი, 4 აპრილი — Sputnik. აფლატოქსინების ის რაოდენობა, რაც „სოფლის ნობათის" რძის ნიმუშებში გამოვლინდა, მწვავე მოწამვლას ვერ გამოიწვევს, განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა პაატა იმნაძემ.
გუშინ სურსათის ეროვნულმა სააგენტომ ინფორმაცია გაავრცელა, რომ „სოფლის ნობათის" რძის 5 ნიმუშში სიცოცხლისთვის სახიფათო მიკოტოქსინი - აფლატოქსინი M1-ის გადაჭარბებული ოდენობა დაფიქსირდა.
„მათი მიღება ხანგრძლივი დროით და დიდი დოზით უნდა გაგრძელდეს, რომ ღვიძლის, ან სხვა რაიმე უფრო მძიმე დაავადება გამოიწვიოს. ამ რაოდენობაზე კი, რომელიც ბევრ განვითარებულ ქვეყანაში არსებულ დასაშვებზე ნაკლებია, ეს საშიშროება არ არსებობს", - განაცხადა პაატა იმნაძემ ჯანდაცვის სამინისტროში გამართულ შეხვედრაზე.
იმნაძის განმარტებით, სხვადასხვა ქვეყანაში აფლატოქსინების სხვადასხვა ნორმატივებია, საქართველო კი ევროპული ნორმატივებით ხელმძღვანელობს, რომელიც ამერიკულზე 10-ჯერ მკაცრია.
სურსათის ეროვნული სააგენტოს ცნობით, აღნიშნული პროდუქტის ბაზრიდან ამოღება და დალუქვა მიმდინარეობს.
კერძოდ, ლაბორატორიული კვლევის შედეგად აფლატოქსინ M1-ის გადაჭარბებული ოდენობა დაფიქსირდა ხუთ ნიმუშში:
სასმელი რძე „საბავშვო", ულტრაპასტერიზებული - 2,5% ცხიმიანობით
სასმელი რძე „რჩეული" ულტრაპასტერიზებული - 1,5% ცხიმიანობით
სასმელი რძე „რჩეული" ულტრაპასტერიზებული - 1,5% ცხიმიანობით
სასმელი რძე „რჩეული" ულტრაპასტერიზებული - 2,5% ცხიმიანობით
სასმელი რძე „რჩეული" ულტრაპასტერიზებული - 3,2% ცხიმიანობით
სურსათის ეროვნული სააგენტო მოუწოდებს მომხმარებელს, არ გამოიყენოს აღნიშნული რძე.
აფლატოქსინი წარმოიქმნება ობის სოკოებისაგან. აფლატოქსინ B1-ით დაბინძურებული საკვები ხვდება ცხოველის ორგანიზმში, საიდანაც გადადის რძეში და გარდაიქმნება M1 აფლატოქსინად, რაც საფრთხეს უქმნის ადამიანის ჯანმრთელობას.