თბილისი, 17 მარტი — Sputnik. თბილისში, ვერაზე 12 ათასამდე აბონენტს გაზმომარაგება დროებით შეუწყდა, ნათქვამია გაზგამანაწილებელი კომპანია „თბილისი ენერჯის“ განცხადებაში.
კომპანიის ინფორმაციით, გაზმომარაგების შეზღუდვის მიზეზი თბილისის მერიის მიერ ვერის პარკისა და „ლაგუნას" მიმდებარე ტერიტორიაზე განსახორციელებელ პროექტთან დაკავშირებული სამუშაოებია.
გაზმომარაგება მოსახლეობას 17 მარტის 10:00 საათიდან 18 მარტის 10:00 საათამდე პერიოდში შეეზღუდება. გაზის მიწოდების აღდგენა დაიწყება 18 მარტის 10:00 საათიდან და დასრულდება 18:00 საათამდე.
დაგეგმილი სამუშაოებიდან გამომდინარე ბუნებრივი აირი არ მიეწოდება როგორც ვერის მოსახლეობის ნაწილს, ისე მცირე და მსხვილ კომერციულ ობიექტებს.
კომპანია მოსახლეობას ბოდიშს უხდის შექმნილი დისკომფორტის გამო და მოუწოდებს, არ დატოვონ გაზის დანადგარები უყურადღებოდ.