თბილისი, 13 მარტი — Sputnik. სამართალდამცველებმა ძალადობისა და სიცოცხლის მოსპობის მუქარის ფაქტზე კრიმინალური პოლიციის დეტექტივი დააკავეს, ნათქვამია სპეციალური საგამოძიებო სამსახურის მიერ გავრცელებულ განცხადებაში.
გამოძიების მიხედვით, ბრალდებულმა მეუღლესთან თანაცხოვრების პერიოდში მასზე ფიზიკური ძალადობა და მუქარა არაერთხელ განახორციელა.
„2024 წლის გაზაფხულზე დაბა სურამში ბრალდებული მეუღლესთან შელაპარაკების ნიადაგზე მას სიცოცხლის მოსპობით დაემუქრა, შუბლზე ცეცხლსასროლი იარაღი მიადო და დაზარალებულს ფიზიკური შეურაცხყოფა მიაყენა. სამართალდამცველი მეუღლეზე ძალადობასა და მუქარას შემდგომშიც აგრძელებდა", - ნათქვამია განცხადებაში.
საგამოძიებო უწყებამ გამოძიება დაზარალებულის მომართვის საფუძველზე დაიწყო. კერძოდ, გამოძიების ფარგლებში, გამოიკითხნენ დაზარალებული და მისი ოჯახის წევრები, გამოთხოვილი იქნა ელექტრონული ინფორმაცია და მოპოვებული იქნა დანაშაულში მამხილებელი მტკიცებულებები.
მტკიცებულებების საფუძველზე სამართალდამცველი სასამართლოს განჩინების საფუძველზე დააკავეს.
დაკავებულს ბრალი საქართველოს სსკ-ის 126-ე პრიმა და 151-ე მუხლებით წარედგინა.