თბილისი, 8 მარტი - Sputnik. გურიაში, რომელიც დიდთოვლობის შედეგად ყველაზე მეტად დაზარალდა, სტიქიის სალიკვიდაციო სამუშაოები დასრულდა.
დასავლეთ საქართველოს რეგიონებში თოვა 22 თებერვალს დაიწყო. უამინდობის გამო საბავშვო ბაღებსა და სკოლებში შეჩერებული იყო სასწავლო-სააღმზრდელო პროცესი, მუშაობა შეწყვიტა მუნიციპალურმა ტრანსპორტმა, ჩაიხერგა ცენტრალური და შიდა სასოფლო გზები, შეფერხდა ენერგო და გაზმომარაგება.
ჩოხატაურის მუნიციპალიტეტის სოფელ სურებთან დამაკავშირებელი გზა დღეს გაიხსნა და უკვე ყველა ადმინისტრაციულ ერთეულთან დამაკავშირებელი გზა სრულად აღდგენილია.
ასევე ინტენსიურად იწმინდება შიდა სასოფლო და საუბნო გზები და ეს პროცესიც მალე დასრულდება.
რეგიონს შეუფერხებლად მიეწოდება ბუნებრივი აირი და ელექტროენერგია.
თოვლით დაზარალებული გურიის მოსახლეობის დასახმარებლად 140 ტონა სასურსათო პროდუქცია და პირველადი მოხმარების საგნები ჩაიტანეს, რომელიც სტიქიით დაზარალებულ მოქალაქეებს ამ დრომდე ურიგდება.
დიდთოვლობასთან დაკავშირებით გურიაში საკოორდინაციო შტაბი შეიქმნა. ასევე მობილიზებული იყვნენ საგანგებო სიტუაციების მართვის სამსახურის თანამშრომლები და თავდაცვის ძალები. მაშველებმა ათობით ადამიანი უსაფრთხო ადგილზე გადაიყვანეს.
საქართველოს პრემიერ-მინისტრ ირაკლი კობახიძის გადაწყვეტილებით დიდთოვლობის შედეგად მოსახლეობისთვის მიყენებული ზარალის შესასწავლად სპეციალური კომისია შეიქმნა, რომელიც დეტალურად შეისწავლის ზარალს, რის შემდეგაც შესაბამისი გადაწყვეტილებები იქნება მიღებული.
კერძოდ, დიდთოვლობის შედეგად დაზიანებულ სახლებს სახელმწიფო აღადგენს, ხოლო მოქალაქეებს, რომელთა სახლებიც გარემონტებას არ ექვემდებარება – ალტერნატიული საცხოვრებლით უზრუნველყოფს.