თბილისი, 7 მარტი — Sputnik. საქართველოს ბიზნეს სექტორში ბრუნვის, გამოშვებისა და დასაქმების რეკორდული მაჩვენებლები ეკონომიკური ზრდის მაღალი ტემპების წინაპირობაა, განაცხადა ეკონომიკისა და მდგრადი განვითარების მინისტრის მოადგილემ ვახტანგ ცინცაძემ.
ქვეყნის ეკონომიკა სწრაფად იზრდება. საქართველოს ეკონომიკური ზრდა 2021 წელს 10,6% იყო, 2022 წელს - 11%, 2023 წელს - 7,5%, 2024 წელს - 10,4%. 2025 წლის იანვარში ეკონომიკის ზრდამ 11,1% შეადგინა.
„2024 წელს 9,5% - იანი ეკონომიკური მაჩვენებელი დიდწილად კერძო სექტორის ეკონომიკური აქტივობის ზრდამ განაპირობა. 2024 წლის მეოთხე კვარტლის ბიზნეს სექტორის მაჩვენებლებით კიდევ ერთხელ დადასტურდა, რომ კერძო სექტორში საკმაოდ პოზიტიური ტენდენციები მთელი გასული წლის განმავლობაში ფიქსირდებოდა. კერძოდ, რეკორდულია როგორც ბრუნვის, ასევე გამოშვების და დასაქმების მაჩვენებლები“, - განაცხადა მინისტრის მოადგილემ.
2024 წლის მეოთხე კვარტალში ბიზნეს სექტორის ბრუნვა გაიზარდა 10%-ით, გამოშვება კი დაახლოებით 11% -ით და 23,5 მლრდ ლარი შეადგინა.
ცინცაძის თქმით, გამოშვების ზრდაში მნიშვნელოვანი წვლილი შეიტანეს მშენებლობის, ინფორმაციისა და კომუნიკაციის, მრეწველობის, ტრანსპორტისა და დასაწყობების სექტორებმა.
როგორც მინისტრის მოადგილემ აღნიშნა, 2024 წლის მეოთხე კვარტალში დასაქმებულთა რაოდენობა დაახლოებით 30 ათასით გაიზარდა, დასაქმებულთა ოდენობამ კი 811 ათასს გადააჭარბა. რაც შეეხება საშუალო ხელფასს, ვახტანგ ცინცაძის თქმით, ის 170 ლარზე მეტად გაიზარდა და 2367 ლარი შეადგინა.
დასაქმებულთა საერთო რაოდენობიდან 56,3%-ს შეადგენენ მამაკაცები, 43,7%-ს - ქალები.
„აღნიშნული პოზიტიური ტენდენციები განპირობებულია იმ სწორი და თანმიმდევრული ეკონომიკური პოლიტიკით, რასაც საქართველოს მთავრობა ახორციელებს. ქვეყანაში არაერთი სახელმწიფო პროგრამა არსებობს, რომლებიც მცირე და საშუალო მეწარმეობის კონკურენტუნარიანობის ზრდაზე არის მიმართული“, - განაცხადა ცინცაძემ.
მისი თქმით, ეს პროგრამები ხელს უწყობს ქვეყანაში ადგილობრივ წარმოების განვითარებას, რომელიც, ადგილობრივი ბაზრის დაკმაყოფილებასთან ერთად, ორიენტირებულია საექსპორტო პოტენციალის ათვისებაზე.
სამთავრობო პროგრამა „აწარმოე საქართველოში“ ერთ-ერთი ყველაზე წარმატებულია ქვეყანაში. ის 2014 წლის ზაფხულში შეიქმნა და მისი მიზანია ადგილობრივი წარმოების განვითარება და წახალისება. 2017 წლის აპრილში შეიქმნა ამავე დასახელების სააგენტო, რომელმაც გააერთიანა ყველა სახელმწიფო პროგრამა, მიმართული ბიზნეს-სექტორისა და ქვეყნის ეკონომიკის განვითარებისკენ.
სააგენტოს „აწარმოე საქართველოში" პროგრამები მიკრო და მცირე ბიზნესის განვითარებასთან ერთად, მიმართულია თანამედროვე სამეწარმეო კულტურის დამკვიდრებაზე და ახალი სამუშაო ადგილების შექმნაზე. საუბარია კრედიტების სუბსიდირებასა და უზრუნველყოფაზე, რომელიც მოიცავს საქმიანობის 200-ზე მეტ სახეობას და მიკროგრანტებს, რომლებიც საქმიანობის 300-მდე სახეობას ეხება.