თბილისი, 2 მარტი — Sputnik. ევროპის სამოგზაურო გამოცემების ჟურნალისტები საქართველოს ტურისტულ პოტენციალს ეცნობიან, იუწყება საქართველოს ტურიზმის ეროვნული ადმინისტრაცია.
სააგენტო პრესტურის ფარგლებში შვეიცარიიდან, ავსტრიიდან, საფრანგეთიდან, ესპანეთიდან და დიდი ბრიტანეთიდან სამოგზაურო და სათხილამურო მედიის წარმომადგენლებს მასპინძლობს.
უწყების ცნობით, Neue Zürcher Zeitung-ის, Powderguide-ის ki Actu-ს, MK Sport-ის, Snowboard International Magazine-ისა და Sidetracked Magazine-ის ექვსი ჟურნალისტი, ფოტოგრაფი და ოპერატორი სვანეთს ესტუმრა - უცხოური მედიის წარმომადგენლებმა სვანეთის სამთო კურორტები დაათვალიერეს.
უცხოელი ჟურნალისტები ტურიზმის ეროვნული ადმინისტრაციის ორგანიზებით გამართულ ზამთრის ფესტივალ „გიზ-გიზს“ დაესწრნენ. ჟურნალისტები სვანეთში ფრირაიდის მსოფლიო ტურ Freeride World Tour Freeride World Tour-ს დაესწრნენ, რომელშიც სხვადასხვა ქვეყნის რაიდერებმა მიიღეს მონაწილეობა.
ფრირაიდი ზამთრის სპორტის განსაკუთრებული სახეობაა, რომელიც რთულ და მთიან რელიეფზე გაუკვალავ თოვლში სრიალს გულისხმობს. ეს სახეობა მსოფლიოში ახალი მიმართულებაა, რომელსაც დიდი პოტენციალი აქვს. სწორედ ამიტომ საერთაშორისო სათხილამურო და სნოუბორდის ფედერაციამ (FIS) საკუთარ შემადგენლობაში შეიყვანა და ღონისძიებები მათი ეგიდით ტარდება.
„აქაური მთები ძალიან დიდი და მასიურია, მე ვურჩევდი ხალხს ჩემს ქვეყანაში, რომ საქართველოში იმოგზაურონ, რადგან აქ საოცარი სათხილამურო ტრასებია, მაღალი ხარისხის თოვლია და ულამაზესი ბუნებაა“, - განაცხადა ავსტრიელმა ჟურნალისტმა ტიმო მაკვანმა.
საქართველომ ფრირაიდის მსოფლიო ტურს მეორედ უმასპინძლა. შეჯიბრში მსოფლიოს 50 გამორჩეული რაიდერი ასპარეზობდა, მათ შორის იყო საქართველოს წარმომადგენელი, „ვაილდ ქარდის მფლობელი“ ჯაბა სხვედიანი.
პრესტურის მონაწილეები საქართველოს ზამთრის ტურისტული მიმართულების, სამთო სპორტის, ქართული კულტურისა და სამზარეულოს შესახებ სტატიებსა და ვიდეო რგოლებს ამზადებენ.
საქართველოს ცნობადობის გაზრდისა და ტურისტული ნაკადების მოზიდვის მიზნით, ტურიზმის ეროვნული ადმინისტრაცია უცხოელი ჟურნალისტებისთვის, ინფლუენსერებისა და ბლოგერებისთვის მედიატურებს პერიოდულად მართავს.