თბილისი, 1 მარტი - Sputnik. გურიისა და იმერეთის რეგიონებში დიდთოვლობით დაზარალებული მოსახლეობის დასახმარებლად სურსათი, პირველადი მოხმარების პროდუქტები და სათბობი შეშა გაიგზავნა. ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.
უწყების ცნობით, 140 ტონა გაგზავნილი პროდუქტი გურიის მხარის სამ მუნიციპალიტეტში და 40-მდე ტონა კი იმერეთის მხარის ექვს მუნიციპალიტეტში განაწილდა და მოსახლეობას გადაეცა
გურიის რეგიონში სტიქიით დაზარალებული მოსახლეობა საშეშე რესურსითაც მომარაგდა. ეროვნულმა სატყეო სააგენტომ რეგიონში ჯამში 1200 კუბური მეტრი სათბობი შეშა გააგზავნა. სათბობი მერქანი გურიის რეგიონის "საქმიან ეზოებში" გადანაწილდა, საიდანაც რეგიონის სამივე მუნიციპალიტეტის მოსახლეობა მომარაგდა.
სამინისტროს ინფორმაციით, სტიქიით დაზარალებული მოსახლეობის დახმარების პროცესში ჩართულია დაცული ტერიტორიების სააგენტოს 30-მდე რეინჯერი შესაბამისი მაღალი გამავლობის მანქანებით და ბურანებით. რეინჯერები ახდენენ მოსახლეობის ტრანსპორტირებას, ასევე ჩართულნი არიან სტიქიის ზონის დრონებით მონიტორინგის პროცესში.
გარემოსდაცვითი ზედამხედველობის დეპარტამენტის ეკიპაჟები ჩართულები არიან როგორც მოქალაქეთა ტრანსპორტირებით უზრუნველყოფაში, ასევე ახორციელებენ მედიკამენტებითა და სურსათით მომარაგებას.
დასავლეთ საქართველოს რეგიონებში ინტენსიური თოვა 22 თებერვალს დაიწყო. დიდთოვლობამ დასავლეთ საქართველოს რამდენიმე რეგიონი - აჭარა, სამეგრელო, იმერეთი, გურია დააზარალა - მუშაობა შეწყვიტა მუნიციპალურმა ტრანსპორტმა, საბავშვო ბაღებსა და სკოლებში შეჩერდა სასწავლო-სააღმზრდელო პროცესი, ჩახერგილია ცენტრალური და შიდა სასოფლო გზები, ჩამოინგრა საცხოვრებელი სახლები, შეფერხდა ენერგო და გაზმომარაგება.
დასავლეთ საქართველოში დიდთოვლობასთან დაკავშირებით რამდენიმე დღეა საგანგებო რეჟიმში მუშაობს შსს-ს ყველა შესაბამისი დანაყოფი. სალიკვიდაციო სამუშაოებში ჩართულია თავდაცვის სამინისტროს სამხედრო ძალები. ჯარისკაცები და სამხედრო ტექნიკა სხვადასხვა მუნიციპალიტეტებში არიან განაწილებულები.
გუშინ, მეტეოროლოგიური პირობების გაუმჯობესებისთანავე, დასავლეთ საქართველოში დიდთოვლობის სალიკვიდაციო სამუშაოებში სასაზღვრო პოლიციის ვერტმფრენი ჩაერთო.