თბილისი, 4 დეკემბერი – Sputnik. ილია ღლონტი, სოციალურ ქსელში ჯგუფ „დაიტოვეს“ ერთ-ერთი დამფუძნებელი, სადაც განიხილება თბილისში საპროტესტო აქციების სტრატეგია, პოლიციასთან და სპეცრაზმთან ბრძოლის მეთოდები, ქვეყნდება აქციების განრიგი და ა.შ., წერს რომ მის სახლში სამართალდამცავები მივიდნენ.
28 ნოემბრიდან, როდესაც პრემიერმა ევროკავშირში გაწევრიანებაზე მოლაპარაკებების გახსნის დღის წესრიგიდან ამოღების შესახებ გადაწყვეტილება გააჟღერა, ქვეყანაში პროტესტის ტალღა აგორდა. ყოველ საღამოს პარლამენტთან იკრიბება ასობით ადამიანი, მათი ნაწილი წინა დღეებში აზიანებდა ინფრასტრუქტურას, ესროდა ძალოვანებს ქვებს, ბოთლებს, პიროტექნიკას, „მოლოტოვის კოქტეილებს“, პოლიცია კი იყენებდა წყლის ჭავლს, ცრემლსადენ გაზს და „წიწაკის სპრეის“.
აქციები დილამდე გრძელდება, დღისით კი ხელისუფლება აცხადებს, რომ „რადიკალური ოპოზიციის“ და მათი დასავლელი პატრონების მიერ დაგეგმილი „ნაცმაიდანი“ ჩაიშალა.
ყველა ეს პარტია 26 ოქტომბრის არჩევნების შედეგად მოხვდა პარლამენტში, მაგრამ უარი თქვა „ქართული ოცნების“ გამარჯვებასა და ახალ საკანონმდებლო ორგანოში მუშაობაზე.
ოპოზიცია, ასევე პრეზიდენტი სალომე ზურაბიშვილი და მისი მხარდამჭერი არასამთავრობო ორგანიზაციები ახალ საპარლამენტო არჩევნებს ითხოვენ. მათივე თქმით, ხელისუფლებამ 26 ოქტომბერს არჩევნები გააყალბა, შემდეგ გამოაცხადა ევროინტეგრაციის შეჩერება, ახლა კი სასტიკად უსწორდება მათ, ვინც ამ გადაწყვეტილებას არ ეთანხმება.
პრეზიდენტი და ოპოზიცია „ქართული ოცნების“ გადაწყვეტილებას უწოდებს საბოლოო მტკიცებულებას იმისა, რომ მათ ქვეყნის საგარეო პოლიტიკური ვექტორი დასავლეთიდან რუსეთისკენ შეატრიალეს. ამავე დროს, ისინი აცხადებენ, რომ საქართველოს ახლა „არალეგიტიმური ხელისუფლება“ მართავს, რადგან 26 ოქტომბრის საპარლამენტო არჩევნები გაყალბდა.
საპროტესტო აქციები პერმანენტულად სხვადასხვა ქალაქში იმართება, თუმცა თბილისში პროტესტის ტალღამ სისტემატური და მასშტაბური ხასიათი მიიღო.
საპროტესტო აქციები არ წყდება, მიუხედავად ქვეყნის უმაღლესი ხელმძღვანელობის არაერთი ახსნა-განმარტებისა, რომ ევროინტეგრაცია პრიორიტეტშია და ისინი აგრძელებენ მუშაობას იმისათვის, რომ საქართველო 2028 წლის ბოლოსთვის ეკონომიკური თვალსაზრისით სათანადოდ მოემზადოს ევროკავშირში 2030 წელს გაწევრიანებისთვის მოლაპარაკებების დასაწყებად.
ამასთან, პრემიერ-მინისტრმა განაცხადა, რომ თუ ევროკავშირი გადაწყვეტს გახსნას მოლაპარაკებები, ის მზადაა ნებისმიერ დროს მოაწეროს ხელი შესაბამის დოკუმენტს.