დაზუსტდა საქართველოში ეკონომიკური ზრდის მაჩვენებელი - 2023 წელი

თბილისი, 16 ნოემბერი — Sputnik. 2023 წელს საქართველოს მშპ-ის რეალურმა ზრდამ, 2022 წელთან შედარებით 7,8% შეადგინა, ნათქვამია საქართველოს სტატისტიკის ეროვნული სამსახურის „საქსტატი“ მასალებში.

ამრიგად, ეკონომიკური ზრდის საშუალო მაჩვენებელი 0,3 საპროცენტო პუნქტით გაიზარდა იმ მონაცემებთან შედარებით, რომლებიც დაზუსტდა მიმდინარე წლის მარტში, როდესაც მშპ-მ 7,5% შეადგინა.

დაზუსტებული მონაცემებით, მიმდინარე ფასებში 2023 წელს მშპ-ის მოცულობამ 30,8 მლრდ დოლარი შეადგინა. აღნიშნულ პერიოდში დეფლატორმა 2,9% შეადგინა. მშპ-მ ერთ სულ მოსახლეზე 8.284 დოლარი შეადგინა (ერთი წლის წინ - 6.731,2 დოლარი იყო).

2023 წელს ყველაზე მეტი ზრდა აჩვენა შემდეგმა სფეროებმა: ინფორმაცია და კომუნიკაცია, პროფესიული სამეცნიერო-ტექნიკური საქმიანობა, განათლება, ვაჭრობა.

კლება დაფიქსირდა სოფლის მეურნეობის, სატყეო მეურნეობისა და მეთევზეობის (-3,4%), სამთო მომპოვებელ (-19,6%), უძრავი ქონების სფეროში (-2,0%), ასევე ელექტროენერგიის, გაზის, ორთქლისა და კონდიცირებული ჰაერის (-2,5%) მიწოდების სფეროებში, ჯანდაცვისა და სოციალური მომსახურების (-4,6%) სფეროებში.

მშპ-ის სტრუქტურაში ყველაზე მაღალი ხვედრითი წილი აქვს შემდეგ სფეროებს: ვაჭრობა, უძრავი ქონება, გადამამუშავებელი მრეწველობა და ა.შ.

ბოლო წლებში საქართველოს მშპ სტაბილურად იზრდება. საქართველოს ეკონომიკურმა ზრდამ 2021 წელს 10,6% შეადგინა, 2022 წლის საშუალო მაჩვენებელი 11% იყო. 2024 წლის სექტემბერში რეალურმა ეკონომიკურმა ზრდამ 2023 წლის ანალოგიურ პერიოდთან შედარებით 8,3% შეადგინა, ხოლო 2024 წლის იანვარ-სექტემბერში მშპ-ს რეალური ზრდის საშუალო მაჩვენებელმა - 9,8%.