თბილისი, 26 ოქტომბერი — Sputnik. მმართველი პარტია „ქართული ოცნების“ გენერალურმა მდივანმა კახა კალაძემ მოუწოდა ყველა პარტიას ხელი შეუწყონ საპარლამენტო არჩევნების მშვიდ გარემოში ჩატარებას და აღნიშნა, რომ ნებისმიერ კანონდარღვევას კანონის შესაბამისად გაეცემა პასუხი.
ჩხუბი მოხდა თბილისში - გლდანის №60 და ისნის №51 საარჩევნო უბნებზე, ქალაქ ზუგდიდში მე-9 საარჩევნო უბანზე და სოფელ ყიზილაჯლოს №74-ე უბანზე. გარდა ამისა, ყიზილაჯლოში საარჩევნო უბნის ტერიტორიაზე წიწაკის სპრეი გამოიყენეს. გარდა ამისა, საოლქო საარჩევნო კომისიამ ბათილად ცნო მარნეულის №69 უბნის მონაცემები, სადაც ბიულეტენების ჩაყრის ფაქტი დაფიქსირდა.
„მოვუწოდებ ყველას, ხელი შევუწყოთ არჩევნების მშვიდ გარემოში ჩატარებას. თქვენ ხედავთ რადიკალური ოპოზიციის კუთვნილი კონკრეტული მედიის და კონკრეტული ჯგუფების მიერ კოორდინირებულ მცდელობებს ხელოვნურად შეიტანონ არეულობები საარჩევნო პროცესში, რათა შეიქმნას მცდარი წარმოდგენა არჩევნების მშვიდობიანი მიმდინარეობის წინააღმდეგ“, - განაცხადა კალაძემ.
თითოეულ კანონდარღვევას პასუხი კანონის მთელი სიმკაცრით გაეცემა, აღნიშნა მან.
როგორც მმართველი პარტიის გენმდივანმა აღნიშნა, დღეს იმართება საპარლამენტო არჩევნები, რომელსაც გადამწყვეტი მნიშვნელობა აქვს ქვეყნის მომავლისთვის.
„დღეს ჩვენ ვწყვეტთ, ჩვენი ქვეყანა ბნელ მომავალს დაუბრუნდება თუ შეინარჩუნებს მშვიდობასა და ღირსებას, რომლის გარეშეც ქვეყნის განვითარება უბრალოდ წარმოუდგენელი და შეუძლებელია“, - განაცხადა კალაძემ.
როგორც მან აღნიშნა, რომ არჩევნებში ამომრჩეველთა უპრეცედენტო აქტივობა ფიქსირდება. 15:00 საათის მონაცემებით, არჩევნებში 1 454 837-მა ადამიანმა მიიღო მონაწილეობა, რაც ამომრჩეველთა საერთო რაოდენობის 41,62%-ია.
„აღსანიშნავია, რომ სამი საათის მონაცემებით, უპროცენტო მაღალი აქტივობა ფიქსირდება, რაც რადიკალური ოპოზიციის წარმატების შანსს არ ტოვებს. ადგილობრივი საარჩევნო შტაბების წინასწარი მონაცემებით, „ქართულ ოცნებას“ უკვე გარანტირებული აქვს სოლიდური უმრავლესობა საქართველოს პარლამენტში“, - განაცხადა კალაძემ.
დღეს ამომრჩევლები საქართველოს პარლამენტის 150 წევრს პროპორციული საარჩევნო სისტემის საფუძველზე აირჩევენ. კენჭისყრა ელექტრონული ტექნოლოგიების - ვერიფიკაციის და ხმების დათვლის აპარატების გამოყენებით იმართება. მანდატები განაწილდება იმ პოლიტიკურ პარტიებზე, რომლებიც არჩევნებში მონაწილე ამომრჩეველთა ნამდვილი ხმების 5%-ს მიიღებენ. პარლამენტის არჩევნებში 18 პოლიტიკური პარტია მონაწილეობს.
წლევანდელ საპარლამენტო არჩევნებზე ხმის მიცემას სულ 3.508.294 ამომრჩეველი შეძლებს, აქედან 95.910 უცხოეთში - საზღვარგარეთ მყოფი საქართველოს მოქალაქეები 42 ქვეყნის 53 ქალაქში 67 საარჩევნო უბანზე მისცემენ ხმას.
საქართველოს პარლამენტის არჩევნებთან ერთად ერთად, რომელზეც დამოკიდებულია თუ ვინ მართავს ქვეყანას მომდევნო ოთხი წლის განმავლობაში, დღეს ასევე ტარდება აჭარის ავტონომიური რესპუბლიკის უმაღლესი საბჭოს და სამტრედიისა და ჩოხატაურის საკრებულოს შუალედური არჩევნები.