თბილისი, 26 ოქტომბერი — Sputnik. საქართველოში საპარლამენტო არჩევნები მშვიდ ვითარებაში მიმდინარეობს, თუმცა რიგ უბანზე მცირე ინციდენტები დაფიქსირდა, განაცხადა ცესკოს პრესსპიკერმა ნათია იოსელიანმა ბრიფინგზე.
საქართველოში საპარლამენტი არჩევნებზე 10:00 საათისათვის 324 197-მა ადამიანმა მისცა ხმა, რაც ამომრჩეველთა საერთო რაოდენობის 9,27%-ია.
„ამ ეტაპზე საარჩევნო უბნებზე ხმის მიცემის პროცესი ძირითადად მშვიდ ვითარებაში მიმდინარეობს. გარკვეულ შემთხვევებში ფიქსირდება საუბნო საარჩევნო კომისიების მუშაობის პროცესის ხელის შეშლის ფაქტები", - განაცხადა იოსელიანმა.
მან პარტიების, მედიასაშუალებების წარმომადგენლებს და დამკვირვებლებს მოუწოდა, არ ჩაერიონ კომისიების მუშაობაში და დაიცვან საარჩევნო უბანზე ქცევის წესები.
იოსელიანმა ასევე ისაუბრა საარჩევნო უბნებზე დარღვევის ფაქტების შესახებ. მისი თქმით, ერთ უბანზე დაფიქსირდა ამომრჩევლისთვის ორი ბიულეტენის გადაცემის ფაქტი, მეორეზე კი დაფიქსირდა ბიულეტენის გადაღების მცდელობა, რაც კანონით აკრძალულია.
დღეს ამომრჩევლები საქართველოს პარლამენტის 150 წევრს პროპორციული საარჩევნო სისტემის საფუძველზე აირჩევენ. კენჭისყრა ელექტრონული ტექნოლოგიების - ვერიფიკაციის და ხმების დათვლის აპარატების გამოყენებით იმართება. მანდატები განაწილდება იმ პოლიტიკურ პარტიებზე, რომლებიც არჩევნებში მონაწილე ამომრჩეველთა ნამდვილი ხმების 5%-ს მიიღებენ. პარლამენტის არჩევნებში 18 პოლიტიკური პარტია მონაწილეობს.
წლევანდელ საპარლამენტო არჩევნებზე ხმის მიცემას სულ 3.508.294 ამომრჩეველი შეძლებს, აქედან 95.910 უცხოეთში - საზღვარგარეთ მყოფი საქართველოს მოქალაქეები 42 ქვეყნის 53 ქალაქში 67 საარჩევნო უბანზე მისცემენ ხმას.
საქართველოს პარლამენტის არჩევნებთან ერთად ერთად, რომელზეც დამოკიდებულია თუ ვინ მართავს ქვეყანას მომდევნო ოთხი წლის განმავლობაში, დღეს ასევე ტარდება აჭარის ავტონომიური რესპუბლიკის უმაღლესი საბჭოს და სამტრედიისა და ჩოხატაურის საკრებულოს შუალედური არჩევნები.
ხმის მიცემის პროცესს მონიტორინგს 1700-ზე მეტი საერთაშორისო და 111 ადგილობრივი ორგანიზაციის 23 ათასზე მეტი წარმომადგენელი უწევს. პროცესს აშუქებს 199 მედიასაშუალების 2800-ზე მეტი წარმომადგენელი.