თბილისი, 21 ოქტომბერი - Sputnik. თბილისში კიდევ ერთი საბაგირო გზა ამოქმედდება, რომელიც თავისუფლების მოედანსა და თაბორის ქედს დააკავშირებს. ამის შესახებ ინფორმაციას თბილისის მერია ავრცელებს.
ამ დროისთვის დედაქალაქში სამი საბაგირო გზა ფუნქციონირებს – რიყის პარკიდან ნარიყალამდე, ჭავჭავაძის გამზირიდან კუს ტბამდე და რუსთაველის გამზირიდან მთაწმინდის პარკამდე.
„საბაგირო გზა დაახლოებით 5 წუთში ფარავს მანძილს თავისუფლების მოედნიდან თაბორის ქედამდე", - განაცხადა თბილისის მერმა კახა კალაძემ, რომელმაც პრემიერ-მინისტრ ირაკლი კობახიძესთან ერთად პროექტის განხორციელებას გაეცნო.
მერიის ინფორმაციით, საბაგირო გზა ორსექციანი და 34-გონდოლიანია. საბაგიროს ორივე სექციას საათში 1 ათასი მგზავრის გადაყვანა შეუძლია. საბაგირო გზის პროექტი, რომლის ღირებულება 20 მლნ აშშ დოლარს შეადგენს, საქართველოს ტურიზმის განვითარების ფონდმა განახორციელა.
ახალი საბაგირო
© Tbilisi City Hall
გასულ კვირას კალაძემ, პრემიერ კობახიძესთან ერთად რუსთველის გამზირისა და მთაწმინდის პარკის დამაკავშირებელი საბაგირო გზა გახსნა.
რუსთაველი–მთაწმინდის დამაკავშირებელი საბაგირო გზის სამშენებლო-სარეაბილიტაციო სამუშაოები 2021 წლის სექტემბერში დაიწყო. პროექტის ჯამური ღირებულებამ 50 მლნ ლარი შეადგინა.
საბაგირო აღჭურვილია 21 ერთეული 8-ადგილიანი გონდოლით. მარშრუტის სიგრძე 845,55 მეტრი, მგზავრობის დრო კი დაახლოებით 4 წუთია. საბაგირო გზა საათში დაახლოებით 1200 მგზავრის გადაყვანას უზრუნველყოფს.