თბილისი, 3 სექტემბერი — Sputnik. ლგბტ-პროპაგანდას შეუძლია ქართული იდენტობის წაშლა 2-3 თაობაში, განაცხადა მმართველი პარტია „ქართული ოცნების“ აღმასრულებელი მდივანი მამუკა მდინარაძე.
მმართველმა პარტია „ქართულმა ოცნებამ“ აგვისტოს ბოლოს ჩამოთვალა პარლამენტში საკონსტიტუციო უმრავლესობის (3/4 მანდატის) მოპოვების შემთხვევაში განსახორციელებელი გეგმები, რომელთა შორისაა „ოჯახური ფასეულობებისა და არასრულწლოვანთა დაცვის შესახებ“ კანონის მიღება. ფსევდოლიბერალური იდეოლოგიის გავრცელება მსოფლიოსა და საქართველოში თანდათან სულ უფრო საშინელ სახეს იძენს, მიიჩნევენ პარტიაში.
„საუკუნეების მანძილზე სხვადასხვა დამპყრობლები ცდილობდნენ ჩვენი ერის განადგურებას, მაგრამ ჩვენ აქ ვართ, ქართულად ვლაპარაკობთ, ეს ქვეყანა და ქართველი ხალხი არსებობს. ზუსტად 2-3 თაობაში ლგბტ-პროპაგანდა შეძლებს ამის წაშლას“, - განაცხადა მდინარაძემ.
ლგბტ-პროპაგანდას შეუძლია გაანადგუროს ის, რისი განადგურებაც ამ ქვეყანაში ვერც ერთმა დამპყრობელი ვერ შეძლო, აღნიშნა დეპუტატმა.
მისი თქმით, მათ, ვინც ამ თემას „თითიდან გამოწოვილს“ ეძახის, უნდა ახსოვდეს 2024 წლის ოლიმპიადის გახსნის ცერემონია პარიზში.
„თუ ვინმეს ეპარება ეჭვი, რომ დღეს ეს არის გამოწვევა, დაე, კარგად გადახედოს ოლიმპიადის გახსნას. ჩვენ ვიზრუნებთ, რომ ამ ქვეყანაში ცხოვრება ოლიმპიადის გახსნას არ ჰგავდეს“, - განაცხადა მდინარაძემ.
როგორც მმართველმა პარტიამ ადრე განაცხადა, 2024 წლის პარიზის ოლიმპიადის გახსნის ცერემონიალმა, რომელიც შეიცავდა უკიდურესად უხეში, აღმაშფოთებელი მკრეხელობის ელემენტებს, ქრისტიანთა რელიგიური გრძნობების შეურაცხყოფას და ლგბტ-პროპაგანდას, კიდევ ერთხელ შეახსენა საზოგადოებას იმ საფრთხის მასშტაბები, რომლებიც დაკავშირებულია ფსევდოლიბერალური იდეოლოგიის გავრცელებასთან.
თითოეული მოქალაქის უფლებები უნდა იყოს დაცული ყველა ხელისუფლების მიერ, მაგრამ როდესაც საქმე ეხება პროპაგანდას, რომელსაც აქვს კონკრეტული მიზნები, მას უნდა ებრძოლო „ყველა არსებული ლეგიტიმური საშუალებით“.
27 ივნისს პარლამენტმა პირველი მოსმენით მიიღო ახალი კანონის პროექტი „ოჯახური ფასეულობებისა და არასრულწლოვანთა დაცვის შესახებ“ და მისგან გამომდინარე კანონპროექტების პაკეტი.
ახალი კანონის პროექტის თანახმად, იკრძალება ერთსქესიანთა ქორწინება და სქესის შეცვლა, ჰეტეროსექსუალი ადამიანების მიერ შვილად აყვანა, ლგბტ-პროპაგანდა და პოპულარიზაცია საგანმანათლებლო დაწესებულებებსა და მედიაში, ლგბტ-პოპულარიზაციის მიზნით მანიფესტაციების ჩატარება და ა.შ.