საქართველოს ნაკრებმა პარამკლავჭიდის მსოფლიო ჩემპიონატზე 96 მედალი მოიპოვა

თბილისი, 24 აგვისტო – Sputnik. მოლდოვაში მიმდინარე მკლავჭიდის მსოფლიოს ჩემპიონატზე ქართველმა პარასპორტსმენებმა წარმატებით იასპარეზეს - 96 მედალი მოიპოვეს და გუნდურ ჩათვლაში პირველი ადგილი დაიკავეს.

მოლდოვა მასპინძლობს მკლავჭიდის 45-ე მსოფლიო ჩემპიონატს და პარამკლავჭიდის 26-ე მსოფლიო ჩემპიონატს. ჩემპიონატში 60 ქვეყნიდან 1500-ზე მეტი სპორტსმენი მონაწილეობდა, ტურნირი დღეს სრულდება.

საქართველომ სულ 36 ოქროს, 32 ვერცხლისა და 28 ბრინჯაოს მედალი მოიპოვა. ქართველი პარამკლავჭიდელები მსოფლიოს ჩემპიონატზე სპორტის სამინისტროს მხარდაჭერით იმყოფებოდნენ.

„საქართველოს კულტურისა და სპორტის სამინისტრო ქართველ პარამკლავჭიდელებს მსოფლიოს ჩემპიონატზე წარმატებას ულოცავს“, - ნათქვამია სამინისტროს მილოცვის ტექსტში.