თბილისი, 12 აგვისტო – Sputnik. პრემიერ-მინისტრმა ირაკლი კობახიძემ სვანეთში მწვერვალ შხელდაზე (4.386 მ) ალპინისტ არჩილ ბადრიაშვილის გარდაცვალების გამო მწუხარება გამოთქვა.
ინფორმაცია მთამსვლელის დაღუპვის შესახებ კვირას გავრცელდა. მაშველებმა მწვერვალ შხელდიდან სამი ალპინისტის ევაკუაცია განახორციელეს. სწორედ მათ განაცხადეს, რომ ჯგუფის ერთ-ერთი წევრი, სავარაუდოდ, მეხის დაცემას ემსხვერპლა. მოგვიანებით გაირკვა, რომ საუბარია არჩილ ბადრიაშვილზე. ის 34 წლის იყო.
„არჩილი იყო უმაღლესი კლასის მთამსვლელი, რომელმაც ორ თანაგუნდელთან ერთად, პირველად ქართული ალპინიზმის ისტორიაში, ყველაზე პრესტიჟული სპორტული ჯილდო - ოქროს წერაყინი მოიპოვა. ვუსამძიმრებ არჩილ ბადრიაშვილის ოჯახის წევრებს, მეგობრებს, ახლობლებსა და კოლეგებს“, - აღნიშნავს პრემიერი.
რა მოხდა მწვერვალ შხელდაზე
ცნობილ ქართველი მთასვლელს სვანეთში ექსპედიციაში სამი ადგილობრივი მოყვარული ალპინისტი ჰყავდა წაყვანილი.
10 აგვისტოს საღამოს ამინდი მოულოდნელად გაუარესდა. მწვერვალ შხელდადან დაშვების პროცესში მეხი ახალგაზრდა სპორტსმენთან ახლოს დაეცა და არჩილი კლდიდან გადააგდო. გადარჩენილმა სამმა ახალგაზრდამ რუსული სიგნალის დაჭერა შეძლო. მედია წერს, რომ სწორედ იქაურმა მხარემ შეატყობინა საქართველოს შინაგან საქმეთა სამინისტროს მომხდარის შესახებ. მაშველებმა სამივე ალპინისტის გადარჩენა შეძლეს.
ვერტმფრენმა არჩილ ბადრიაშვილის ცხედარს გუშინ, 11 აგვისტოს საღამოს მიაგნო, მაშველებმა მწვერვალ შხელდაზე გარდაცვლილი მთამსვლელი დაახლოებით 3800 მეტრის სიმაღლეზე, კლდოვან ფერდობზე იპოვეს, თუმცა რთული რელიეფიდან გამომდინარე, გარდაცვლილი სპორტსმენის ამოყვანა ამ დრომდე ვერ მოხერხდა.
ვინ არის არჩილ ბადრიაშვილი
34 წლის არჩილ ბადრიაშვილი გამოცდილი ალპინისტი იყო. 2022 წელს სამ ქართველ მთამსვლელს - ბაქარ გელაშვილს, არჩილ ბადრიაშვილსა და გიორგი ტეფნაძეს - პაკისტანში მდებარე მწვერვალ სარაგრარის (7300 მ) დალაშქვრისთვის მსოფლიო ალპინიზმში ერთგვარი „ოსკარი“ - „ოქროს წერაყინი 2022“ (Piolet d'Orза) გადაეცათ.
ქართველმა მთამსვლელებმა აღნიშნული მწვერვალი 2021 წელს დაიპყრეს.
„ოქროს წერაყინი“ - ეს არის საერთაშორისო პრემია ალპინიზმში გამოჩენილი მიღწევებისთვის, რომელსაც ყოველწლიურად ფრანგული ჟურნალი Montagnes და The Groupe de Haute Montagne 1992 წლიდან გადასცემს.
არჩილი ამ პრესტიჟულ პრიზზე კიდევ სამჯერ იყო წარდგენილი. გასულ თვეში ბადრიაშვილმა კიდევ ერთი აუსვლელი მწვერვალი - ინდოეთში მდებარე ნანდა შორი დაიპყრო.