თბილისი, 31 ივლისი — Sputnik. პარიზის 2024 წლის ოლიმპიური თამაშების ძიუდოს ტურნირის მეხუთე საშეჯიბრო დღე მოქმედმა ოლიმპიურმა ჩემპიონმა, 90 კგ-მდე წონით კატეგორიაში მოასპარეზე ლაშა ბექაურმა გამარჯვებით გახსნა.
მერვედფინალში ბექაურმა ბულგარელი ივაიოლო ივანოვი ვაზარით დაამარცხა და მეოთხედფინალში გავიდა.
მომდევნო ეტაპზე ბექაურის მეტოქე სამხრეთკორეელი ჰანი იქნება.
ბექაური არის 2020 წლის ზაფხულის ოლიმპიური თამაშების ჩემპიონი, 2019 წლის ზაფხულის უნივერსიადის ვერცხლის პრიზიორი, 2021 წლის ევროპის ჩემპიონატის გამარჯვებული. 2022 და 2023 წლების მსოფლიო ჩემპიონატების პრიზიორი. კადეტთა შორის საქართველოს ჩემპიონი და პრიზიორი, კადეტთა შორის ევროპისა და მსოფლიოს ჩემპიონი, იუნიორთა შორის ევროპისა და მსოფლიოს ჩემპიონი და ევროპის თასის ეტაპების პრიზიორი.
ოლიმპიადის ოთხი დღის შედეგებით საქართველოს ნაკრების ანგარიშზე ერთი მედალია - საქართველოს დელეგაციას ვერცხლის მედალი ძიუდოისტმა ტატო გრიგალაშვილმა მოუტანა.