თბილისი, 20 ივლისი - Sputnik. საქართველოს ტურიზმის ეროვნული ადმინისტრაცია ლონდონში The National Geographic Traveller Food Festival-ზე მონაწილეობს, ნათქვამია უწყების მიერ გავრცელებულ ინფორმაციაში.
საერთაშორისო გასტრონომიულ ფესტივალზე, „მასტერკლასის თეატრში” ქართული ღვინისა და კერძების მასტერკლასების 4 სესია ტარდება.
ფესტივალის ფარგლებში, საქართველოს სტენდზე ღვინის დეგუსტაცია და ე.წ. Show Kitchen ორი დღის განმავლობაში არის დაგეგმილი.
ფესტივალის მონაწილეებს ცნობილი შეფები გურამ ბაღდოშვილი და თეკუნა გაჩეჩილაძე ქართულ ტრადიციულ და თანამედროვე კერძებს აცნობენ, ღვინის ეროვნული სააგენტოს წარმომადგენელი ირაკლი ჩოლობარგია კი ქართული ღვინის დეგუსტაციას მართავს.
The National Geographic Traveller Food Festival 2024-ზე საქართველოს როგორც ღვინის სამშობლოს და ღვინის წარმოების 8 ათასწლოვან ქვეყანას განსაკუთრებული ყურადღება ეთმობა.
ფესტივალს 200-მდე ქვეყნიდან 2000-მდე ვიზიტორი ესწრება.