თბილისი, 7 ივლისი — Sputnik. საქართველო გამოჩენილ მევიოლინე ლიანა ისაკაძეს კვირას, 7 ივლისს, 14:00 საათზე გამოემშვიდობება - მუსიკოსს მახათას მთაზე, საზოგადო მოღვაწეთა პანთეონში დაკრძალავენ, ნათქვამია თბილისის ვ. სარაჯიშვილის სახელობის სახელმწიფო კონსერვატორიის განცხადებაში.
მსოფლიოში ცნობილი მევიოლინე, დირიჟორი და მასწავლებელი ლიანა ისაკაძე, 5 ივლისს, 78 წლის ასაკში გარდაიცვალა.
„თბილისის სახელმწიფო კონსერვატორიის სახელით ვუერთდებით საერთო მწუხარებას უდიდესი მუსიკოსის, ვიოლინოს ჯადოქრის, ქალბატონ ლიანა ისაკაძის გარდაცვალების გამო. ვუსამძიმრებთ ოჯახის წევრებს, მეგობრებსა და კოლეგებს, ასევე საქართველოსა და მსოფლიოს დიდ მუსიკალურ საზოგადოებას. პანაშვიდები დაგეგმილია ვერის სასაფლაოზე მდებარე პანტელეიმონ მკურნალის სახელობის ტაძარში. გასვენება - კვირას, 7 ივლისს, 14:00 საათზე კონსერვატორიის დიდი დარბაზის ფოიედან“,- აღნიშნულია კონსერვატორიის ინფორმაციაში.
ლიანა ისაკაძე ბრწყინვალე მუსიკოსი და მსოფლიო მასშტაბით აღიარებული ქართველი მევიოლინეა. ის შეყვანილია მსოფლიოს ყველა იმ გამოცემაში, რომელშიც საუკუნის საუკეთესო მევიოლინეების შემოქმედება განიხილება. მისი შესრულება გამოირჩეოდა არტისტურობით, ღრმა მუსიკალურობითა და ვირტუოზულობით.
ლიანა ისაკაძე 1946 წლის 2 აგვისტოს თბილისში დაიბადა. ის 3 წლის ასაკში გახდა მუსიკოსი და ვუნდერკინდებს მიაკუთვნებდნენ. მან თავისით ისწავლა როიალზე დაკვრა და კომპოზიცია. 3 წლის კომპოზიტორი საერთო გაოცებას იწვევდა. მოგვიანებით კი ვიოლინო აიღო ხელში.
მუსიკალური განათლება თბილისის ცენტრალურ მუსიკალურ სკოლაში 9 წლის ლიანა ისაკაძეს აკომპანიმენტს სახელმწიფო ორკესტრი უწევდა, ხოლო 10 წლის მევიოლინე უკვე სოლო-კონცერტით წარდგა მსმენელის წინაშე. 10 წლის ასაკში იგი მიიწვიეს საერთაშორისო ფესტივალ – კონკურსზე მოსკოვში, სადაც მან პროფესიონალ მუსიკოსთა საკონკურსო პროგრამა ბრწყინვალედ შეასრულა. ლიანა ისაკაძის სახელი მთელ საბჭოთა კავშირში გავრცელდა.
12 წლის ლიანა ისაკაძეს პირველი პრემია მიენიჭა ამიერკავკასიის მევიოლინეთა კონკურსზე. 14 წლის ასაკში, როგორც გამონაკლისი, იგი მიიწვიეს მუსიკოსთა საკავშირო კონკურსზე (კონკურსში მონაწილეთა ასაკის ქვედა ზღვარი 17 წელი იყო), სადაც მეორე პრემია აიღო.
12 წლის ლიანა ისაკაძეს პირველი პრემია მიენიჭა ამიერკავკასიის მევიოლინეთა კონკურსზე. 14 წლის ასაკში, როგორც გამონაკლისი, იგი მიიწვიეს მუსიკოსთა საკავშირო კონკურსზე (კონკურსში მონაწილეთა ასაკის ქვედა ზღვარი 17 წელი იყო), სადაც მეორე პრემია აიღო.
1974 წელს ისაკაძის შემოქმედებასა და ცხოვრებაზე გადაიღეს იაპონური დოკუმენტური ფილმი, ხოლო 1975 წელს მან ითამაშა ფინურ მხატვრულ ფილმში „სიბელიუსი".
ლიანა ისაკაძემ 1970 წელს დაამთავრა პეტრე ჩაიკოვსკის სახელობის მოსკოვის კონსერვატორია.
1970-1992 წლებში იყო მოსკოვის ფილარმონიის სოლისტი, 1981–1995 წლებში საქართველოს სახელმწიფო კამერული ორკესტრის მხატვრული ხელმძღვანელი.
2001 წელს, თბილისის ფილარმონიის შენობის წინ, ლიანა ისაკაძის საპატიო ვარსკვლავი გაიხსნა, მისივე ავტოგრაფით.
ის თბილისისა და ბათუმის საპატიო მოქალაქე იყო. დაჯილდოებულია საპატიო ნიშნის ორდენით.