თბილისი, 25 ივნისი — Sputnik. ოპოზიციური პარტია „ევროპული საქართველო“ არ შეუერთდება ექვსი ოპოზიციური პარტიის დეკლარაციას საარჩევნო კამპანიის დროს საერთო პოზიციისა და 2024 წლის საპარლამენტო არჩევნებში გამარჯვების შემთხვევაში პოლიტიკური კოალიციისთვის მზადყოფნის შესახებ.
25 მაისს „ერთიანმა ნაციონალურმა მოძრაობამ“, „გირჩი - მეტი თავისუფლება“, „დროა“, „ლელო საქართველოსთვის“, „სტრატეგია აღმაშენებელმა“ და „ახალმა“ ხელი მოაწერეს თანამშრომლობის შესახებ „ქართული ოპოზიციის ერთიანობის დეკლარაციას“, რომელიც ითვალისწინებს არჩევნების წინ ერთიანი სტრატეგიის შექმნას ხელისუფლების შეცვლის უზრუნველსაყოფად, ახალგაზრდულ ორგანიზაციებთან მჭიდრო თანამშრომლობას და ხმების დაცვას. დეკლარაციაზე ხელმომწერები აცხადებენ, რომ დოკუმენტზე მიერთების შესაძლებლობა მიეცემა სხვა ოპოზიციურ პარტიებსაც, მათი სურვილის შემთხვევაში.
„ევროპული საქართველო" დეკლარაციას ხელს არ მოაწერს", - ნათქვამია პარტიის განცხადებაში.
პარტიამ დეკლარაციის ხელმოწერაზე უარის თქმის ოთხი მიზეზი დაასახელა, რომელთა შორის პირველია არჩევნებში „ერთიანი ნაციონალური მოძრაობის“ შემადგენლობაში ერთიანი სიით მონაწილეობაზე უარი.
„ჩვენ ანტიდემოკრატიულად მიგვაჩნია პიროვნების კულტზე დაფუძნებული ჩრდილოვანი მმართველობის მოდელი, რომელსაც „ნაციონალური მოძრაობა“ ახორციელებს ბოლო წლებში და ურყევად გვჯერა, რომ სხვა ოპოზიციური ძალების ასეთ ძალასთან შერევა მხოლოდ ზიანს აყენებს ქართულ დემოკრატიას და იმედს უცრუებს ამომრჩეველს“, - ნათქვამია განცხადებაში.
მეორე არგუმენტად პარტიამ დაასახელა ხმების მობილიზებისთვის რამდენიმე სიმძიმის პოლიტიკური ცენტრის არსებობის აუცილებლობა. ვინაიდან ორპარტიული სისტემა, მათი აზრით, განეიტრალებას საჭიროებს, პარტია მზადაა რამდენიმე პარტიასთან გაერთიანებისთვის კონსულტაციები დაიწყოს.
კიდევ ერთ მიზეზად პარტიამ დაასახელა პარტიებს შორის დებატებისთვის სივრცის არსებობის აუცილებლობა, რათა მოხერხდეს ამომრჩეველთა ინფორმირება და იყოს შესაძლებლობა, გააკრიტიკონ „ნაციონალური მოძრაობა" იმ ქმედებებისთვის, რომლებიც ძირს უთხრის ოპოზიციის გამარჯვებას.
როგორც პარტიაში აღნიშნეს, 2018 წლის საპრეზიდენტო არჩევნების წინ „ნაცმოძრაობამ" ოპოზიციის დეკლარაციის შესახებ შეთანხმება დაარღვია. მაშინ იგეგმებოდა ერთიანი კანდიდატის წარდგენა, თუმცა კანდიდატურაზე აზრთა სხვადასხვაობის გამო ერთობა დაიშალა. „ნაციონალურმა მოძრაობამ“ პრეზიდენტობის კანდიდატად გრიგოლ ვაშაძე წარადგინა, ხოლო „ევროპულმა საქართველომ“ - დავით ბაქრაძე.
საპარლამენტო არჩევნები 2024
საპარლამენტო არჩევნები საქართველოში 26 ოქტომბერს გაიმართება. ეს იქნება პირველი არჩევნები, რომელიც უბნების 90%-ზე ელექტრონული ტექნოლოგიით ჩატარდება. ამომრჩევლები ხმას მისცემენ ისევ საარჩევნო უბნებზე, მაგრამ ახალი ბიულეტენებით, შედეგები სპეციალური მთვლელი მანქანის მეშვეობით დაითვლება. მანამდე ელექტრონული კენჭისყრის სისტემა ფარავდა უბნების მცირე ნაწილს და საპილოტე რეჟიმში ხორციელდებოდა.
ეს ასევე იქნება პირველი არჩევნები საქართველოში, რომელიც ჩატარდება სრულად პროპორციული სისტემით, რაც ნიშნავს, რომ პარლამენტში 150 მანდატი შეივსება პარტიებისთვის ხმის მიცემის საფუძველზე. ამასთან, პარტია პარლამენტში შესვლას მხოლოდ იმ შემთხვევაში შეძლებს, თუ ხმების მინიმუმ 5%-ს მიიღებს.
საპარლამენტო უმრავლესობის მოსაპოვებლად, რაც მთავრობის ერთპიროვნული დამტკიცების საშუალებას იძლევა, პარტიას მოუწევს ამომრჩეველთა სულ მცირე 50%-ის მხარდაჭერის მოპოვება, რომლებიც მივლენ საარჩევნო უბნებზე როგორც საქართველოში, ასევე მის ფარგლებს გარეთ.
საპარლამენტო არჩევნები განსაზღვრავს, თუ ვის ექნება უფლება ჩამოაყალიბოს მთავრობა და მართოს ქვეყანა მომდევნო ოთხი წლის განმავლობაში.
წინასწარი ინფორმაციით, წელს არჩევნებზე უპრეცედენტო რაოდენობის დამკვირვებლები ჩამოვა. ეუთოს გარდა, მრავალრიცხოვანი მისიის გამოგზავნა აპირებენ ევროკავშირი და აშშ. 2024 წლის ოქტომბერში მოახლოებული საპარლამენტო არჩევნების დემოკრატიულად და სამართლიანად ჩატარება ევროკავშირის ერთ-ერთი მოთხოვნაა საქართველოს მიმართ.