თბილისი, 20 ივნისი — Sputnik. თბილისში ორი დღეა პროფესორ გიორგი გახელაძეს ეძებენ, ინფორმაცია ამის შესახებ სოციალურ ქსელში მისმა მეუღლემ ირმა მალაციძემ დაწერა.
57 წლის მამაკაცი გუშინ დილით გავიდა სახლიდან და უკან აღარ დაბრუნებულა.
„არ მჯერა, რომ ამას ვწერ, მაგრამ სხვა გზა არ მაქვს! გიორგი გუშინ დილით გავიდა სახლიდან და არ დაბრუნებულა. ტელეფონი გათიშულია. ვერ ვპოულობთ ვერსად, არ უნახავს არავის. პოლიციაში განვაცხადეთ და ეძებენ. გთხოვთ, თუ ვინმეს გუშინ გქონდათ მასთან კომუნიკაცია, ან სატელეფონო, ან ნახეთ, მომწერეთ“, - დაწერა ირმა მალაციძემ.
მისივე ინფორმაციით, გიორგი გახელაძე დიდი დიღმიდან ვაკეში მიდიოდა, მას ეცვა ღია ფერის პერანგი და მუქი ფერის შარვალი. თან ჰქონდა ზურგჩანთა.
„თუ რაიმე ინფორმაცია გაქვთ, დამირეკეთ: 599311090", - დაწერა ირმა მალაციძემ.
გახელაძე არის ქართულ-ბრიტანული უნივერსიტეტის და აღმოსავლეთ ევროპის უნივერსიტეტის ასოცირებული პროფესორი და ასევე ილიას სახელმწიფო უნივერსიტეტის მოწვეული პროფესორი.
გიორგი გახელაძე აქტიურად ეწევა სამეცნიერო-კვლევით საქმიანობას. არის რამდენიმე მეთოდური სახელმძღვანელოს ავტორი და მთარგმნელი, 10-ზე მეტი ადგილობრივი და საერთაშორისო სამეცნიერო პუბლიკაციის ავტორი, ეროვნული სასწავლო გეგმისა და განათლების რეფორმის სხვადასხვა დოკუმენტის თანაავტორი. არაერთ სამეცნიერო საგრანტო პროექტში განმახორციელებელი მკვლევარი.