თბილისი, 31 მაისი – Sputnik. ჩინური კომპანიის ტენდერში გამარჯვება იძლევა იმის გარანტიას, რომ ანაკლიაში პირველი ღრმაწყლოვანი პორტის მშენებლობის პროექტი განხორციელდება უმაღლეს დონეზე, განაცხადა პრემიერ-მინისტრმა ირაკლი კობახიძემ.
დიდი ალბათობით, პროექტის განხორციელებაში მთავრობის პარტნიორი კერძო ინვესტორის შესარჩევ კონკურსში გამარჯვებული ჩინეთ-სინგაპურის კონსორციუმი (ჩინური კომპანია China Communications Construction Company Limited და სინგაპურის კომპანია China Harbor Investment Pte, იქნება, რომელმაც ერთადერთმა შემოიტანა განაცხადი.
„შემოიტანეს ძალიან კარგი განაცხადი და, შესაბამისად, ჩინური კომპანიის მიერ ამ ტენდერის მოგება იძლევა იმის გარანტიას, რომ ანაკლიის პროექტი განხორციელდება უმაღლეს დონეზე“, - განაცხადა კობახიძემ.
ოპოზიციურ პარტიაში „ლელო საქართველოსთვის“, რომლის დამფუძნებელიც არის მამუკა ხაზარაძე, რომელმაც თავის დროზე „ანაკლიის პორტის განვითარების კონსორციუმი“ შექმნა, მაგრამ პორტის აშენება ვერ შეძლო, განაცხადეს, რომ „ ССС" “ შეერთებული შტატებისა და მსოფლიო ბანკის შავ სიაშია. ხელისუფლებამ ამ ინფორმაციას სიცრუე უწოდა.
„რაც შეეხება პოლიტიკურ ოპონენტებს, რომლებიც ჩართული იყვნენ ანაკლიის გარშემო პროცესებში, შეგახსენებთ, არაერთხელ გადაუვადა სახელმწიფომ, თუმცა ვერცერთხელ ვერ შეძლეს ინვესტორის მოზიდვა. ეს არის მათი პასუხისმგებლობა, თუმცა ცდილობენ ამის სხვაზე გადატანას“, - განმარტა კობახიძემ.
პრემიერის თქმით, პროექტის განვითარება მთავრობის ინტერესებშია, ხოლო ამ პროექტის რეალიზაცია განსაკუთრებით მნიშვნელოვანია ჩინური კომპანიისთვის, რადგან ჩინურ ტვირთებს ენიჭებათ განსაკუთრებული მნიშვნელობა ამ პორტის მაქსიმალურად ეფექტური ფუნქციონირებისთვის.
„შესაბამისად, სპეკულაციები არის უადგილო, თუმცა ჩვენ ვხედავთ, რომ ვინც დაიწყო ეს სპეკულაციები, იღებს საგრანტო დაფინანსებას უცხოური საეჭვო წყაროებიდან და ამით არის ნაკარნახევი ის ანტიჩინური კამპანია, რომელსაც შესაბამისი პოლიტიკოსები და მათი „ენჯეოები“ აწარმოებენ“, – განაცხადა კობახიძემ.
პრემიერმა აღნიშნა, რომ წარსულში „ანაკლიის განვითარების კონსორციუმმა“ ვერ მოიზიდა ვერც ერთი ინვესტორი, მიუხედავად იმისა, რომ ხელისუფლებამ პროექტი კონსტიტუციაშიც კი შეიტანა, რათა ინვესტორების მოზიდვა გაადვილებულიყო.
საქართველოს პარლამენტმა ანაკლიის ღრმაწყლოვანი პორტი კონსტიტუციაში შეიტანა, როგორც განსაკუთრებული პრიორიტეტი.
„ორგანული კანონის მიხედვით, ანაკლიაში იქმნება სპეციალური ეკონომიკური ზონა, სადაც მოქმედებს სპეციალური სამართლებრივი რეჟიმი. „ორგანული კანონით შეიძლება შეიქმნას სხვა სპეციალური ეკონომიკური ზონებიც განსაკუთრებული სამართლებრივი რეჟიმით“, - ასე ჩაიწერა საქართველოს კონსტიტუციაში 2020 წლამდე, ანაკლიის განვითარების კონსორციუმთან“ ხელშეკრულების გაწყვეტამდე.
„თუმცა საკონსტიტუციო დათქმის პირობებშიც კი, მათ ვერ დააინტერესეს ვერც ერთი ინვესტორი, რადგან სინამდვილეში მათ, სავარაუდოდ, კორუფციული ინტერესები ჰქონდათ და არა პორტის განვითარების ინტერესი “, - განაცხადა პრემიერმა.
საქართველოს ხელისუფლებამ გადაწყვიტა ანაკლიაში პორტის მშენებლობა იმ პირობით განაახლოს, რომ სახელმწიფოს წილი 51% იქნება.
ანაკლიის პორტის მშენებლობის პროექტზე სახელმწიფოს კერძო პარტნიორის შერჩევის ფარგლებში საკვალიფიკაციო მოთხოვნები მხოლოდ ორმა პრეტენდენტმა დააკმაყოფილა - შვეიცარიულ-ლუქსემბურგულმა კომპანიამ (Terminal Investment Limited Holding S.A. (T.I.L Holding S.A.) და ჩინეთ-სინგაპურის კონსორციუმმა (ჩინური კომპანია China Communications Construction Company Limited და სინგაპურის კომპანია China Harbor Investment Pte Ltd).
პრეტენდენტებს 20 მაისამდე უნდა წარმოედგინათ ტექნიკური, კომერციული და ფინანსური წინადადებები და კომენტარები ხელშეკრულებაზე. წინადადებები მითითებულ ვადაში მხოლოდ ჩინეთ-სინგაპურის კონსორციუმისგან შემოვიდა.
ინვესტორის შერჩევის შემდეგ, სახელმწიფოს მიერ 2023 წელს დაარსებული კომპანია „ანაკლიის საზღვაო ნავსადგური“, კერძო პარტნიორთან ერთად, ერთობლივ კომპანიას შექმნის, რომელშიც სახელმწიფო წილი 51% იქნება. ერთობლივ კომპანიას პორტის განვითარების ვალდებულება დაეკისრება.
ამ დროისთვის სახელმწიფო კომპანია „ანაკლიის საზღვაო ნავსადგურმა“ ჩაატარა მოსამზადებელი სამუშაოები საზღვაო ინფრასტრუქტურის მშენებლობისთვის (დრენაჟი, წყალგამტარი) - განახლდა/შეიქმნა ძირითადი საპროექტო დოკუმენტაცია, დაქირავებული იქნა საკონსულტაციო კომპანია, რომელიც მონაწილეობდა მომზადებაში. სატენდერო დოკუმენტაცია და საერთაშორისო ტენდერის ჩატარება კერძო ინვესტორის გამოსავლენად.
სახელმწიფო კომპანიას კაპიტალური შენატანის სახით სამშენებლო სამუშაოების პირველი ეტაპისთვის საჭირო მიწის ნაკვეთი გადაეცა.
კომპანია „ანაკლიის საზღვაო ნავსადგურის“ საწესდებო კაპიტალი 3 მილიონ ლარს შეადგენს. ის ეკუთვნის სახელმწიფო შპს საკუთრებაში არსებულ „აქტივების მართვისა და განვითარების კომპანიას“.