თბილისი, 24 აპრილი — Sputnik. ახალგაზრდების სოციალური მეწარმეობის პროექტების ხელშეწყობის პროგრამაზე რეგისტრაცია დღეს დაიწყო და 15 მაისამდე გაგრძელდება, განაცხადა დედაქალაქის მერმა კახა კალაძემ თბილისის მთავრობის დღევანდელ სხდომაზე.
დედაქალაქის მერიამ სოციალური საწარმოების ფინანსური მხარდაჭერისა და ახალგაზრდების დასაქმების მიზნით სოციალური მეწარმეობის პროექტების დაფინანსების პროგრამა 2022 წელს დაიწყო. აღნიშნული პროგრამის ფარგლებშიც დაფინანსდება როგორც პროდუქციის, ისე სხვადასხვა სფეროს მიმართულებით სერვისების შექმნა.
„განახლებული პირობების თანახმად, ახალგაზრდულ ორგანიზაციას შეუძლია მიიღოს მონაწილეობა აღნიშნულ პროგრამაში და მოიპოვოს დაფინანსება 50 ათასი ლარის ოდენობით“, - განაცხადა კალაძემ.
პროგრამა ითვალისწინებს ახალგაზრდების მიერ არასამეწარმეო (არაკომერციული) იურიდიული პირის ფორმით დაფუძნებული სოციალური საწარმოების ფინანსურ მხარდაჭერას და ბიზნეს-მოდელზე მორგებული პროექტების განხორციელებას.
პროგრამას აქვს ერთი მხრივ სოციალური, მეორე მხრივ კი ეკონომიკური მიზანი, ემსახურება შემოსავლის მიღებას და ახალგაზრდების სოციალურ-ეკონომიკურ გაძლიერებას.
უწყების ცნობით, შესაძლებელია დაფინანსდეს სოციალური მისიის მქონე პროექტები, მათ შორის: მცირე ზომის საწარმოების, ლაბების, შემოქმედებითი სტუდიების, სახელოსნოების, ჰოსტელების, კაფე- ბარების, სასწავლო ცენტრების, გასართობ-სარეკრეაციო ცენტრების შექმნისა და განვითარების მიზნით.
დაინტერესებული პირები პროგრამასთან დაკავშირებით დამატებით ინფორმაციას თბილისის მერიის ვებგვერდზე გაეცნობიან.