თბილისში თანამედროვე ხელოვნების ბაზრობა იხსნება

თბილისი, 11 აპრილი — Sputnik. დედაქალაქის მერიის მხარდაჭერით, „ექსპო ჯორჯიას“ სივრცეში დღეს თბილისის თანამედროვე ხელოვნების ბაზრობა იხსნება, ნათქვამია უწყების მიერ გავრცელებულ ინფორმაციაში.

ხელოვნების სფეროში რეგიონში ყველაზე დიდი ღონისძიება, მრავალფეროვანი პროგრამით და მეტი სიახლით 11-დან 14 აპრილამდე გასტანს.

წლევანდელ გამოფენაში 30-ზე მეტი ადგილობრივი და საერთაშორისო გალერეა მონაწილეობს, რომლებიც სხვადასხვა ქვეყნის არტისტებს წარადგენენ.

დამოუკიდებელი არტისტების სივრცეში 45 ხელოვანის ნამუშევრები იქნება წარმოდგენილი.

თბილისის თანამედროვე ხელოვნების ბაზრობა 14:00 საათზე ექსკლუზიური ჩვენებით გაიხსნება, რომელსაც ხელოვნების მიმართულების სპეციალისტები და სხვა მოწვეული სტუმრები დაესწრებიან.

დღესვე, 17:00 საათიდან კი ბაზრობის მონახულება ნებისმიერ მსურველს შეეძლება. ბაზრობა დამთვალიერებლებს ოთხი დღის განმავლობაში უმასპინძლებს.

თბილისის თანამედროვე ხელოვნების ბაზრობა, მასშტაბური გამოფენა-გაყიდვის გარდა, დამთვალიერებელს შესთავაზებს ქართველი და უცხოელი არტისტების კურირებულ გამოფენებს, მასტერ კლასებსა და Art Talk-ებს.

გამოფენა 11 აპრილს 17:00-დან 21:00 საათამდე მიიღებს დამთვალიერებელს, ხოლო 12-14 აპრილს - 12:00-დან 20:00 საათამდე.