თბილისში ბინებზე მოთხოვნა კვლავ მზარდია - თებერვლის მონაცემები

თბილისი, 15 მარტი – Sputnik. თბილისში ბინებზე მოთხოვნა 2024 წლის დასაწყისიდან იზრდება - თებერვალში 3,4 ათასი ობიექტია გაყიდული, რაც 0,9%-ით მეტია 2023 წლის ანალოგიური პერიოდის მაჩვენებელზე, ნათქვამია საერთაშორისო საინვესტიციო კომპანია Galt & Taggart-ის ანგარიშში.

ანალიტიკოსები გაყიდვების ზრდას პირველად ბაზარზე ბინების რეალიზაციის მატებას უკავშირებენ (სამშენებლო კომპანიების/დეველოპერების მიერ გაყიდული უძრავი ქონება), სადაც 1,6 ათასზე მეტი ბინა გაიყიდა, რაც 11,8%-ით მეტია 2023 წლის თებერვალთან შედარებით.

ამავდროულად, გაყიდვები ერთ წელიწადში 7,5%-ით შემცირდა მეორად ბაზარზე (უძრავი ქონების რეალიზაცია ინდივიდუალური მესაკუთრის მიერ).

თებერვალში გაყიდული ბინების თითქმის ნახევარი (49%) დიდი დიღმის (646 ბინა), საბურთალოს (568 ბინა) და სამგორის (475 ბინა) რაიონებზე მოდიოდა. ამასთან, გაყიდვები შემცირდა დედაქალაქის ცენტრალურ რაიონებში - ვაკეში (135 ბინა) და მთაწმინდაზე (41 ბინა) შესაბამისად 11,2%-ით და 35,9%-ით.

G&T-ის ინფორმაციით, ბაზრის სხვა ძირითადი მახასიათებლები უცვლელი დარჩა - გაყიდვების ყველაზე დიდი წილი საშუალო ფართის ბინებზე (51-80 მ2) მოდის მათი ხელმისაწვდომობისა და გაქირავების სიმარტივის გამო. გარდა ამისა, შეინიშნება ბიუჯეტური ბინების წილის კლება (501-800 დოლარი კვ.მ-ზე), რაც ფასების მატებასთან არის დაკავშირებული.

ასევე თებერვალში, 2023 წლის ანალოგიურ პერიოდთან შედარებით, პირველად ბაზარზე უძრავი ქონების ფასების ზრდის დინამიკა შენარჩუნდა. საშუალოშეწონილი ფასი 16,5%-ით გაიზარდა და 1,3 ათასი დოლარი შეადგინა. ასევე, გასული წლის თებერვალთან შედარებით მეორად ბაზარზე ძველ და ახალ ბინებზე ფასები შემცირდა 2,2%-ით და 4,1%-ით შესაბამისად.

2024 წლის თებერვალში თბილისის საცხოვრებელი უძრავი ქონების ბაზრის მოცულობა წინა წელთან შედარებით 4,9%-ით გაიზარდა და წლიურ ჭრილში 258,8 მლნ აშშ დოლარი შეადგინა. ანალიტიკოსებმა ეს ძირითადად წინა წელთან შედარებით პირველად ბაზარზე ფასებისა და გაყიდვების ზრდას დაუკავშირეს.