თბილისი, 23 თებერვალი — Sputnik. კოლექტიური უსაფრთხოების ხელშეკრულების ორგანიზაციის (CSTO) სამდივნო სომხეთის პრემიერ-მინისტრ ნიკოლ ფაშინიანის განცხადებებს გამოეხმაურა.
ტელეკომპანია France 24-თვის მიცემულ ინტერვიუში ფაშინიანმა CSTO-ში სომხეთის მონაწილეობის „გაყინვის“ შესახებ განაცხადა, რაც ერევნის ქმედებების ერთგვარი კონსტატაცია გახდა.
„ფაშინიანის თეზისში CSTO-ში სომხეთის მონაწილეობის გაყინვის შესახებ, როგორც ჩანს, საუბარი ეხება ორგანიზაციის ღონისძიებებში არმონაწილეობას", - განაცხადეს РИА Новости-თან CSTO სამდივნოს წარმომადგენელმა.
როგორც ორგანიზაციაში აღნიშნეს, CSTO-ს სამდივნოში ერევნის მხრიდან არ შესულა წევრობის შეჩერების შესახებ განცხადება.
მანამდე სომხეთის ხელისუფლებამ არაერთხელ დაადანაშაულა CSTO და რუსეთი ნაკისრი ვალდებულებების შეუსრულებლობაში. სომხეთის პრემიერ-მინისტრმა ნიკოლ ფაშინიანმა 23 ნოემბერს მინსკში CSTO-ს სამიტში მონაწილეობაზე უარი თქვა. 26 ოქტომბერს, ფაშინიანი ასევე არ დაესწრო ევრაზიის ეკონომიკური კავშირისა და დსთ-ის მთავრობათაშორის საბჭოებს ბიშკეკში, და არც დსთ-ის სამიტს, რომელიც ბიშკეკშივე გაიმართა.
გარდა ამისა, სომხეთმა არ მიიღო მონაწილეობა მინსკში CSTO-ს თავდაცვის მინისტრთა საბჭოს სხდომაში და არც თავისი მაშველები გაგზავნა CSTO-ს ქვეყნების წვრთნებზე, რომელიც სექტემბერში გაიმართა ბელორუსიაში. მანამდე კი სომხეთის ხელისუფლებამ უარი თქვა CSTO-ს სამშვიდობო კონტიგენტების წვრთნების რესპუბლიკაში ჩატარებაზე.
საპასუხოდ, CSTO სომხეთს მოუწოდებს დაუბრუნდეს არსებული პრობლემების კონსტრუქციულ განხილვას. CSTO-ს გენერალურმა მდივანმა იმანგალი ტასმაგამბეტოვმა ამ დღეებში განაცხადა, რომ ორგანიზაციის წევრი-ქვეყნები რჩებიან ორიენტირებული სომხეთთან სამოკავშირეო ურთიერთობების განვითარებაზე.