თბილისი, 19 თებერვალი — Sputnik. თბილისში, ე.წ. დეზერტირების ბაზრის ტერიტორიაზე ახალი სავაჭრო ცენტრის მშენებლობა იგეგმება - შესაბამისი განაცხადი თბილისის არქიტექტურის სამსახურმა უკვე დააკმაყოფილა და მშენებლობის ნებართვაც გაცემულია, იუწყება მედიაპლატფორმა BMG.
არქიტექტურული პროექტის მიხედვით, ორსართულიანი შენობა 15.3 მეტრი სიმაღლის იქნება. სავაჭრო კომპლექსის საერთო ფართობი 17.994 კვადრატულ მეტრს შეადგენს, ხოლო უშუალოდ კომერციული ფართობი 12.458 კვადრატული მეტრი იქნება. ახალი სავაჭრო ცენტრი გააერთიანებს ბრენდულ მაღაზიებსა და საკვებ ობიექტებს.
პროექტს ჰოლდინგ CBS Group-ში შემავალი კომპანია - შპს „თბილისი მოლი" განახორციელებს. აღნიშნული ჰოლდინგის დამფუძნებელია ბიზნესმენი ხვიჩა მაქაცარია.
კომპანიის ინფორმაციით, პროექტის ოფიციალური წარდგენა უახლოეს მომავალში იგეგმება.