თბილისი, 5 თებერვალი – Sputnik. საქართველოს პარლამენტში ვიზიტორებს ეზღუდებათ პარლამენტის სასახლეში შესვლა მიმდინარე წლის 5-8 თებერვალს, საქართველოს მთავრობისათვის ნდობის გამოცხადების საკითხის განხილვის გამო, შეზღუდვა არ შეეხება მედიის წარმომადგენლებს, ნათქვამია საკანონმდებლო ორგანოს განცხადებაში.
პრემიერ-მინისტრობის კანდიდატი სამთავრობო პროგრამას პარლამენტის წევრებს მომავალ კვირას წარუდგენს. საქართველოს პრემიერ-მინისტრობის კანდიდატისთვის ნდობის გამოცხადების საკითხს პლენარულ სხდომაზე 8 თებერვალს უყრიან კენჭს.
პრესსამსახურის ინფორმაციით, „საქართველოს პარლამენტის სასახლეში უსაფრთხოების დაცვის წესის დამტკიცების თაობაზე" საქართველოს პარლამენტის თავმჯდომარის 2023 წლის 04 სექტემბრის N1/259/23 ბრძანების შეესაბამისად, მიმდინარე წლის 5-8 თებერვალს საქართველოს პარლამენტის სასახლეში იმოქმედებს უსაფრთხოების ყვითელი დონე.
„მიმდინარე წლის 5-8 თებერვალს საქართველოს პარლამენტში დაგეგმილია საქართველოს მთავრობისათვის ნდობის გამოცხადების საკითხის განხილვა საქართველოს პარლამენტის კომიტეტებში, ფრაქციებში და პლენარულ სხდომაზე, აგრეთვე 6 თებერვალს საქართველოს პარლამენტი მოისმენს საქართველოს პრეზიდენტის ყოველწლიურ მოხსენებას... ვიზიტორებს ეზღუდებათ პარლამენტის სასახლეში შესვლა. შეზღუდვა არ შეეხება მედია საშუალებების წარმომადგენლებს“, - ნათქვამია განცხადებაში.
განცხადებაში ნათქვამია, რომ აღნიშნული ღონისძიების მიზანია საქართველოს პარლამენტის სასახლეში სამუშაო და უსაფრთხო გარემოს უზრუნველყოფა.
ირაკლი კობახიძის კანდიდატურა პრემიერ-მინისტრის პოსტზე წარედგინა პარლამენტს 2 თებერვალს სამთავრობო პროგრამასთან ერთად (სახელწოდებით „ევროპული სახელმწიფოს მშენებლობისთვის“).
აწ უკვე ყოფილმა პრემიერ-მინისტრმა ირაკლი ღარიბაშვილმა თანამდებობა 29 იანვარს დატოვა, რათა მეტი დრო გაეტარებინა ოჯახთან და გზა გაეხსნა პარტიის სხვა ლიდერებისთვის. ღარიბაშვილმა მთავრობის მეთაურის პოზიციიდან მმართველი პარტია „ქართული ოცნება - დემოკრატიული საქართველოს“ თავმჯდომარის პოსტზე გადაინაცვლა.