თბილისი, 1 თებერვალი — Sputnik. პარლამენტის დეპუტატ ირაკლი ჩიქოვანის თავდაცვის მინისტრის პოსტზე წარდგენის გამო ზუგდიდში რიგგარეშე არჩევნები არ გაიმართება, განაცხადა მმართველი პარტია „ქართული ოცნება-დემოკრატიული საქართველოს" ერთ-ერთმა ლიდერმა მამუკა მდინარაძემ.
ირაკლი ჩიქოვანი პარლამენტში ზუგდიდის მაჟორიტარი დეპუტატია. კანონმდებლობის თანახმად, პარლამენტში მისი შეცვლა მხოლოდ რიგგარეშე არჩევნების გამართვის შედეგადაა შესაძლებელი.
„საარჩევნო წელს, როგორც წესი, [მაჟორიტარობის] არჩევნები არ ტარდება, ამიტომ ზუგდიდი, სამწუხაროდ, მაჟორიტარის გარეშე იქნება. საპარლამენტო არჩევნების შემდეგ კი მაჟორიტარები აღარ გვეყოლება, მაგრამ სიაში აუცილებლად გვეყოლება ისეთი ადამიანები, რომლებიც განსაკუთრებულ ყურადღებას მიაქცევენ ყველა რეგიონს“, - აღნიშნა მდინარაძემ.
საპარლამენტო არჩევნები საქართველოში 2024 წლის 26 ოქტომბერს გაიმართება. დეპუტატებს პირველად ახალი სისტემით აირჩევენ: არჩევნები იქნება მთლიანად პროპორციული და საარჩევნო უბნებზე ელექტრონული კენჭისყრით ჩატარდება. პარტიებისთვის გამსვლელი ბარიერი იქნება 5%. საზოგადოებრივი აზრის ყველა გამოკითხვის თანახმად, დღეს „ქართული ოცნება“ საარჩევნო რბოლის ლიდერია.
თავად მმართველი პარტიის ლიდერები კი აცხადებენ, რომ მათ ქვეყნის მოსახლეობის 70%-ის მხარდაჭერა აქვთ.