თბილისი, 1 თებერვალი — Sputnik. სომხეთის უსაფრთხოება, მათ შორის სამხედრო-ტექნიკურ სფეროში, შეუძლებელია კოლექტიური უსაფრთხოების ხელშეკრულების ორგანიზაციაში (CSTO) თანამშრომლობის გარეშე, განაცხადა რუსეთის საგანგებო დავალებათა ელჩმა ორგანიზაციაში ვიქტორ ვასილიევმა.
ამასთან მან ხაზი გაუსვა, რომ არსებობს ამის დამადასტურებელი ინფორმაცია, მაგრამ მისი გამხელა არ შეუძლია.
ვასილიევის თქმით, რუსეთი კარგად ხედავს დასავლეთის ქვეყნების მცდელობებს, გამოიყენონ სომხეთში არსებული ვითარება არა მხოლოდ იქ, არამედ მთელ კავკასიაში სიტუაციის დასაძაბად, და მოუწოდა სომხეთს, ყურადღება გაამახვილონ ამ ფაქტზე.
„ჩვენ ვიყენებთ დისკუსიებს CSTO-ს ფარგლებში ყველა დონეზე, რათა ჩვენი სომეხი კოლეგების ყურადღება გავამახვილოთ დასავლეთის ქვეყნების ამ შეგნებულ პოლიტიკაზე“, — ხაზგასმით აღნიშნა მან.
მანამდე სომხეთის ხელისუფლებამ არაერთხელ დაადანაშაულა CSTO და რუსეთი ნაკისრი ვალდებულებების შეუსრულებლობაში. სომხეთის პრემიერ-მინისტრმა ნიკოლ ფაშინიანმა 23 ნოემბერს მინსკში CSTO-ს სამიტში მონაწილეობაზე უარი თქვა. 26 ოქტომბერს, ფაშინიანი ასევე არ დაესწრო ევრაზიის ეკონომიკური კავშირისა და დსთ-ის მთავრობათაშორის საბჭოებს ბიშკეკში, და არც დსთ-ის სამიტს, რომელიც ბიშკეკშივე გაიმართა.
გარდა ამისა, სომხეთმა არ მიიღო მონაწილეობა მინსკში CSTO-ს თავდაცვის მინისტრთა საბჭოს სხდომაში და არც თავისი მაშველები გაგზავნა CSTO-ს ქვეყნების წვრთნებზე, რომელიც სექტემბერში გაიმართა ბელორუსიაში. მანამდე კი სომხეთის ხელისუფლებამ უარი თქვა CSTO-ს სამშვიდობო კონტიგენტების წვრთნების რესპუბლიკაში ჩატარებაზე.