თბილისი, 24 იანვარი — Sputnik. რუსეთის საგარეო საქმეთა მინისტრმა სერგეი ლავროვმა და ისრაელის მუდმივმა წარმომადგენელმა გაეროში გილად ერდანმა უშიშროების საბჭოს სხდომაზე, სადაც პალესტინისა და ისრაელის დარეგულირების საკითხი განიხილებოდა, ერთმანეთს უსაყვედურეს.
გილად ერდანმა ირანი გააკრიტიკა და თეირანი რუსეთისთვის იარაღის, კერძოდ, სამხედრო დრონების მიწოდებაში დაადანაშაულა, რომელსაც, მისი თქმით, მოსკოვი უკრაინაში იყენებს.
„დღეს ზოგიერთმა დელეგაციამ შესაძლებლად მიიჩნია, რომ გაზეპირებული სიტყვებით გაემეორებინა რუსეთისადმი ბრალდებები, რომლებიც კიევის ნაცისტური რეჟიმის წინააღმდეგ სამხედრო სპეცოპერაციას შეეხება. კოლეგებო, ამ განცხადებებს თქვენს სინდისზე ვტოვებ, თუმცა მესმის, რომ ის ბევრს გაუძლებს“, — განაცხადა ლავროვმა.
როგორც რუსმა დიპლომატმა თქვა, უშიშროების საბჭოს „არ აქვს უფლება, დაუშვას გაეროს გადაწყვეტილების დასამარება პალესტინის სახელმწიფოს შექმნასთან დაკავშირებით“, როგორც ეს მინსკის შეთანხმებების შემთხვევაში მოხდა.
გარდა ამისა, ლავროვმა შესთავაზა უშიშროების საბჭოს, გამოვიდეს ცეცხლის შეწყვეტის მოწოდებით და მინისტრთა მოლაპარაკებები გამართოს დამოუკიდებელი პალესტინის შექმნის საკითხზე.
ამის შემდეგ, რუსი დიპლომატის თქმით, ახლო აღმოსავლეთის დარეგულირების საკითხზე საერთაშორისო კონფერენცია უნდა ჩატარდეს, რომლის მიზანიც პალესტინის დამოუკიდებლობის გამოცხადება, ისრაელის უსაფრთხოების მექანიზმების განვითარება და არაბულ ქვეყნებთან და ზოგადად მუსლიმურ სახელმწიფოებთან თელა-ავივის ურთიერთობების ნორმალიზება იქნება.
მანამდე ისრაელმა რუსეთის საგარეო საქმეთა სამინისტრო მისი ოფიციალური წარმომადგენლის, მარია ზახაროვას განცხადების გამო გააკრიტიკა. ზახაროვას თქმით, უშიშროების საბჭოში ისრაელის მუდმივი წარმომადგენელი პოლიტიკურ სიტუაციას „დაუსრულებლად უკავშირებს ჰოლოკოსტის თემას“, რომლის „პოლიტიკური მიზნებით ექსპლუატაციასაც შეიძლება საშიში შედეგები მოჰყვეს“.