თბილისი, 13 ნოემბერი − Sputnik. მამაკაცები, რომლებმაც უკვე გადააბიჯეს 40 წელს, იშვიათად ქორწინდებიან მაშინაც კი, თუ მუდმივი პარტნიორი ჰყავთ, ვინაიდან საერთოდ აღარ აქვთ ოჯახურ მარწუხებში მოქცევის სურვილი, აცხადებენ ოჯახის ფსიქოლოგები.
მათი თქმით, მამაკაცის ორგანიზმში ჰორმონალური ფონი საშუალოდ 35 წლის შემდეგ იწყებს შეცვლას, რასაც თავისი შედეგები მოაქვს: 35 წლამდე ასაკის მამაკაცები შეცდომებს უფრო ადვილად ეგუებიან, ხვდებიან, რომ, თუ მცდარ ნაბიჯს გადადგამენ, მისი გამოსწორება ჯერ კიდევ შეიძლება. ასაკის მატებასთან ერთად კი გადამწყვეტი ნაბიჯების გადადგმისა უკვე ეშინიათ. ამიტომაც აღარ უნდათ შეცვალონ ის კომფორტული და მათთვის ჩვეული ცხოვრების წესი, რომელიც ამ დროისთვის აქვთ ჩამოყალიბებული.
„მამაკაცს, რაც უფრო ახლოს არის 40 წელთან, მით უფრო ნაკლები შეცდომის დაშვება სურს. მას უკვე აღარ უნდა არანაირი ექსპერიმენტი. ამ ასაკში მას უკვე აქვს ჩვევები, რომლისგან თავის დაღწევაც რთულიცაა და ამასთან არც ცდილობს მათ მოშორებას. თუ ქალი თანახმაა, მოერგოს ასეთი მამაკაცის ცხოვრებას, მაშინ კაცი მასთან ერთად იცხოვრებს, მაგრამ ეს სულაც არ ნიშნავს იმას, რომ ცოლად შეირთავს“, — ამბობენ ფსიქოლოგები.
ამასთან ირკვევა, რომ იმავე ასაკის ქალბატონებსაც ნაკლებად აინტერესებთ 40 წელს გადაცილებული მამაკაცები.
რაც შეეხება ახალგაზრდა გოგონებს, ისინი ხშირად დიდი სიამოვნებით იწყებენ ურთიერთობას ასაკით უფროს კაცებთან, მაგრამ როგორც კი აღმოაჩენენ, რომ მასთან გამუდმებით მორგებაა საჭირო, ხოლო მამაკაცი ურთიერთობებში უფრო შორს წასვლას არ აპირებს, ისინიც მაშინვე კარგავენ ინტერესს.