თბილისი, 9 ნოემბერი — Sputnik. თბილისში ახალი წლისთვის მზადება დაიწყო – ქალაქის ქუჩებში საახალწლო ილუმინაციები გაჩნდა. ამის შესახებ ინფორმაციას თბილისის მერია ავრცელებს.
„თბილსერვის ჯგუფმა" დედაქალაქის სხვადასხვა რაიონში საახალწლო ილუმინაციები უკვე დაამონტაჟა. კერძოდ, ამ ეტაპზე საახალწლო განათებები რობაქიძის გამზირზე მოეწყო, სადაც სამონტაჟო სამუშაოები კომპანიის 160-მდე თანამშრომელმა სპეცტექნიკის საშუალებით შეასრულა.
საახალწლო განათებების მონტაჟი ნოემბრის დასაწყისიდან იწყება და დეკემბრის შუა რიცხვებში სრულდება. ტრადიციულად, მთავარ ნაძვის ხესა და ილუმინაციებს საზეიმო ვითარებაში დეკემბრის ბოლოს ანთებენ.
მერიის ინფორმაციით, მიმდინარე წელს იგეგმება ახალი ილუმინაციებისა და აქსესუარების მოწყობაც. სამუშაო პროცესის დროს განათებები მხოლოდ სატესტო რეჟიმში ირთვება.