თბილისი, 19 ოქტომბერი — Sputnik. აშშ-ის პრეზიდენტი ჯო ბაიდენი ოვალური კაბინეტიდან მიმართავს ამერიკელებს ისრაელისა და უკრაინის საკითხებზე, აცნობა თეთრი სახლის პრეს-მდივანმა კარინ ჟან-პიერმა ჟურნალისტებს ელექტრონული ფოსტით დაგზავნილი წერილით.
„ხვალ პრეზიდენტი ბაიდენი ერს მიმართავს, რათა ისრაელზე „ჰამასის“ ტერორისტულ თავდასხმასა და უკრაინაში მიმდინარე რუსეთის სასტიკ ომზე ჩვენი პასუხის შესახებ ისაუბროს“, — ნათქვამია ჟან-პიერის წერილში.
გავრცელებული ინფორმაციით, ბაიდენის გამოსვლა დღეს, აღმოსავლეთის დროით 20:00 საათზე გადაიცემა.
როგორც Jerusalem post წერს, ოვალური კაბინეტიდან პრეზიდენტები ძალიან იშვითად აკეთებენ განცხადებებს და, როგორც წესი, ასეთი მიმართვები სერიოზულ კრიზისებს ნიშნავს.
გამოცემას ამის რამდენიმე მაგალითი მოჰყავს. ესენია:
პრეზიდენტ ჯორჯ ბუშის მიმართვა 2003 წელს, როდესაც მან ერაყში შეჭრა გამოაცხადა;
პრეზიდენტ ბარაკ ობამას განცხადება, როდესაც მან სან-ბერნარდინოში ისლამისტების მიერ მასობრივ დაცხრილვაზე ისაუბრა;
პრეზიდენტ დონალდ ტრამპის 2020 წლის მიმართვა COVID-19-ის პანდემიასთან დაკავშირებით.
მანამდე ჯო ბაიდენი ისრაელში იმყოფებოდა, სადაც ქვეყნის პრემიერ-მინისტრ ბენიამინ ნათაიაჰუს, პრეზიდენტ იცხაკ ჰერცოგსა და სხვა მაღალჩინოსნებს შეხვდა. ამერიკის პრეზიდენტი ისრაელიდან იორდანიაში აპირებდა გამგზავრებას არაბი ლიდერების სამიტზე, მაგრამ ალ აჰლის საავადმყოფოში მომხდარი აფეთქების შემდეგ, რასაც ასობით ადამიანი ემსხვერპლა, იორდანიამ შეხვედრა გააუქმა.
წყარო: Jerusalem Post