სიღნაღის მუზეუმში იაპონური თოჯინების გამოფენა გაიხსნა

თბილისი, 26 აგვისტო – Sputnik. სიღნაღის მუზეუმში დამზადების განსაკუთრებული ტექნიკით გამორჩეული იაპონური თოჯინების გამოფენა გაიხსნა, ნათქვამია იაპონიის საელჩოს განცხადებაში.

გამოფენა „ნინგიო - იაპონური თოჯინების ხელოვნება და სილამაზე“, იაპონიის ფონდის ორგანიზებითა და საქართველოში იაპონიის საელჩოს ხელშეწყობით იმართება. მხარდამჭერები არიან ასევე სიღნაღის მუზეუმი, კულტურის სამინისტრო და ეროვნული მუზეუმი.

იაპონიის ფონდის მისიაა, ხელი შეუწყოს მსოფლიოსთან იაპონიის კულტურული ურთიერთობის გაღრმავებას.

იაპონური ხელოვნებისა და კულტურის უცხოეთისთვის გასაცნობად ფონდი განუწყვეტლივ ახორციელებს „მოგზაური გამოფენის“ პროგრამას, რომელიც მოიცავს ფონდის კოლექციის ნამუშევრებს და ყოველწლიურად მსოფლიოს დაახლოებით 80 მუზეუმსა და საგამოფენო სივრცეში ტარდება.

„მოგზაურ გამოფენებში“ წარმოდგენილია ნამუშევრები ხელოვნების 15 სხვადასხვა მიმართულებიდან. მათ შორის არის: თანამედროვე ხელოვნება, ხელნაკეთობა, ფოტოგრაფია, არქიტექტურა, დიზაინი, მანგა და იაპონური თოჯინების კულტურა.

„ნინგიო - იაპონური თოჯინების ხელოვნება და სილამაზე“ ძალიან პოპულარული „მოგზაური გამოფენაა“.

თოჯინების კულტურა, რომელიც იაპონიის ხანგრძლივი ისტორიის მანძილზე ჩამოყალიბდა, წარმოდგენილია 67 რჩეული თოჯინით, რომლებიც იაპონური თოჯინების არქეტიპებად ითვლება.

გამოფენაზე სტუმრებს შესაძლებლობა ექნებათ ახლოდან გაეცნონ იაპონური თოჯინების კულტურას, მათი შექმნისა და განვითარების მრავალწლიან ისტორიას, აღნიშნავენ ორგანიზატორები.

ექსპონატებს შორის წარმოდგენილია თოჯინები, რომელთა წარმოშობაც ძველ დროში ავი სულებისგან განდევნის რიტუალებს უკავშირდება, ასევე თოჯინები, რომელთაც ოსტატური შესრულება და დახვეწილი ტექნიკა გამოარჩევთ.

„ამგვარად, გამოფენაზე შეძლებთ თვალი ადევნოთ „თოჯინების კულტურის გავრცელების ისტორიას“ უძველესი დროიდან დღემდე“, - ნათქვამია საელჩოს განცხადებაში.

აღსანიშნავია, რომ სიღნაღის მუზეუმს იაპონიის ფონდსა და იაპონიის საელჩოსთან ხუთწლიანი თანამშრომლობა და მეგობრობა აკავშირებს. სწორედ აქ მოეწყო 2017 წელს იაპონიის თოჯინების „მოგზაური გამოფენა“.

მას შემდეგ იაპონიის საელჩოს ინიციატივით გაიმართა იაპონელი ხელოვანისა და კალიგრაფისტის, აკემი ლუკასის, მხატვარ-ილუსტრატორ ტაკეჰიდე ჰარადას, დიპლომატისა და მოყვარული ფოტოგრაფის, იმანიში ტაკაოს ნამუშევართა გამოფენები.

გამოფენებთან ერთად საელჩომ საგანმანათლებლო პროგრამები და მასტერ-კლასები ჩაატარა.

გამოფენა „იაპონური თოჯინების ხელოვნება და სილამაზე“ 17 ოქტომბერს დაიხურება.