თბილისი, 23 აპრილი– Sputnik. შემოქმედებისა და ინოვაციის მსოფლიო კვირეულის ფარგლებში საქართველოს ეროვნულ უნივერსიტეტში (სეუ) 24-28 აპრილს ციფრული ტექნოლოგიების დღეები გაიმართება, იუწყებიან ორგანიზატორები.
„ინოვაცია გვაძლევს საშუალებას დავინახოთ ცვლილება, როგორც შესაძლებლობა - და არა როგორც დაბრკოლება” - სტივ ჯობსი. არ გამოტოვოთ შესაძლებლობა შეხვდეთ საინტერესო სპიკერებს და დაესწროთ შეხვედრებს, სადაც განხილული იქნება 21-ე საუკუნის ერთ-ერთი ყველაზე აქტუალური თემები“, - ნათქვამია ღონისძიების ანონსში.
ციფრული ტექნოლოგიების დღეებზე დასწრება ნებისმიერ მსურველს შეუძლია, მათ შორის სკოლის მოსწავლეებსაც. მონაწილეებს გადაეცემათ სერტიფიკატი. თემები - ბლოკჩეინ ტექნოლოგიები, კრიპტოვალუტები და ელექტრონული კომერცია.
ღონისძიების სპიკერები:
ლუკა ლომსაძე - საქართველოში უმსხვილესი ონლაინ საფულის, eMoney-სა და ასევე საქართველოში ყველაზე დიდი კრიპტობირჟის, MyCoins-ის პროექტების მენეჯერი;
ბექა ქემერტელიძე - CityPay.io-ს თანადამფუძნებელი, კრიპტო ექსპერტი და ენთუზიასტი. აქვს 6-წლიანი გამოცდილება კრიპტო და ბლოკჩეინ მიმართულებით და საქართველოში კრიპტო-გარემოს განვითარების მიზნით არის რამდენიმე წარმატებული პროექტის ავტორი და ინიციატორი;
კატო რამიშვილი - ელექტრონული კომერციის სპეციალისტი, Kisa-ს დამფუძნებელი, Etsy და Shopify -ს პლატფორმების ექსპერტი.
ღონისძიებაზე დასწრების მსურველებმა უნდა გაიარონ ონლაინ-რეგისტრაცია.
თბილისში ციფრული ტექნოლოგიების დღეები გაიმართება
© Courtesy of Georgian National University SEU
შემოქმედებისა და ინოვაციების მსოფლიო კვირეული თბილისში იმართება კრეატიულობისა და ინოვაციების მსოფლიო დღის ფარგლებში (World Creativity and Innovation Day).
აღსანიშნავია, რომ ამ დღის დაარსების ინიციატორები მისი აღნიშვნის თარიღს უკავშირებენ დედამიწის საერთაშორისო დღეს, რომელიც აღინიშნება 22 აპრილს, ისევე როგორც დიდი მეცნიერისა და გამომგონებლის, ლეონარდო და ვინჩის დაბადების დღეს, რომელიც აღინიშნება 15 აპრილს.
პირველ შემთხვევაში კავშირი მიუთითებს შემოქმედებისა და ინოვაციების შესაძლებლობებზე ჩვენი საერთო სახლის - დედამიწის განვითარებასა და შენარჩუნებაში, ხოლო მეორე შემთხვევაში - დიდი გამომგონებლის წვლილზე მეცნიერებისა და შემოქმედებითი პროცესების განვითარებაში.
წყარო - სეუ