თბილისი, 11 აპრილი – Sputnik. კინოსა და თეატრის მსახიობი, სახელმწიფო პრემიის ლაურეატი ბესო მეგრელიშვილი 59 წლის ასაკში გარდაიცვალა. ამის შესახებ ინფორმაციას ნოდარ დუმბაძის სახელობის მოზარდ მაყურებელთა თეატრი ავრცელებს.
„გარდაიცვალა ჩვენი თეატრის ერთ-ერთი გამორჩეული არტისტი, მეგობარი, ყველასათვის საყვარელი ბესო მეგრელიშვილი. მან თეატრის სცენაზე არაერთი საინტერესო როლი შექმნა. ვუსამძიმრებთ თეატრის ყველა თანამშრომელს და ოჯახს“, – ნათქვამია განცხადებაში.
მსახიობი წლების განმავლობაში აქტიურად თანამშრომლობდა ახმეტელის, რუსთავის, თავისუფალი, მეტეხის, მარჯანიშვილის, სამეფო უბნის თეატრებთან.
გარდა თეატრისა, ბესო მეგრელიშვილს მონაწილეობა აქვს მიღებული ათამდე ფილმსა და სერიალში, როგორიცაა „მეტიჩარა“, „უძინართა მზე“, „შეყვარებული კულინარის 1001 რეცეპტი“, „ჩემი ცოლის დაქალები", „ყავა და ლუდი“ და ა.შ.