თბილისი, 29 მარტი — Sputnik. მერი არაბიძე მეორე ქართველი მოჭადრაკეა, რომელმაც ევროპული ჭადრაკის ისტორიაში ევროპის ჩემპიონის ტიტული მოიპოვა, იუწყება „პირველი არხი“.
მონტენეგროს ქალაქ პეტროვაცში გამართულ ქალ მოჭადრაკეთა ევროპის ჩემპიონატზე მერი არაბიძემ 11-იდან 8,5 ქულა მოაგროვა.
არაბიძე მთელი ტურნირის განმავლობაში ლიდერობდა და ჩემპიონატი მარცხის გარეშე დაასრულა.
მერი არაბიძე არის 2015 წლის მსოფლიოს გუნდური ჩემპიონატის გამარჯვებული, საჭადრაკო ოლიმპიადისა და ევროპის გუნდური ჩემპიონატების მრავალგზის პრიზიორი. მეორე ადგილი პოლონელმა ოლივია კიოლბასამ დაიკავა (8,5), მესამე - რუსმა ალექსანდრა მალცევსკაიამ, რომელიც 2022 წლიდან პოლონეთის დროშის ქვეშ ასპარეზობს.
მერი არაბიძე მეორე ქართველი ქალი მოჭადრაკეა, რომელიც ევროპის ჩემპიონი გახდა. პირველად კონტინენტის ჩემპიონის ტიტული 2017 წელს ნანა ძაგნიძემ მოიპოვა.