თბილისი, 14 მარტი - Sputnik. მიმდინარე წლის იანვრიდან 10 მარტის ჩათვლით პერიოდში „სარფის" საბაჟო-გამშვებ პუნქტზე მებაჟე-ოფიცრებმა დიდი ოდენობით არადეკლარირებული თანხისა და ფასიანი ქაღალდების შემოტანის ფაქტები აღკვეთეს, ნათქვამია ფინანსთა სამინისტროს შემოსავლების სამსახური ავრცელებს.
უწყების ცნობით, მებაჟეებმა ეჭვის საფუძველზე სხვადასხვა ქვეყნის მოქალაქეების ფიზიკური და ასევე კუთვნილი ბარგის დეტალური დათვალიერების შედეგად გამოავლინეს დიდი ოდენობით არადეკლარირებული თანხა - 225 ათასამდე დოლარი, 12 ათასამდე ევრო, 200 ათასი შვეიცარიული ფრანკი, 80 ათასამდე რუსული რუბლი, 4 ათასი თურქული ლირა და 723.300 (ლირა) ღირებულების ფასიანი ქაღალდები.
არადეკლარირებული თანხის საერთო რაოდენობამ, ეროვნული ბანკის გაცვლითი კურსის მიხედვით 1,3 მლნ ლარი შეადგინა.
საქართველოს საბაჟო კოდექსის 169-ე მუხლის შესაბამისად, სამართალდამრღვევი მოქალაქეები სანქციის სახით, საერთო ჯამში 36 ათასი ლარით დაჯარიმდნენ.
გარდა ამისა, სხვა კანონდამრღვევ მოქალაქეებს სანქციის სახით თანხის 10%-ის ოდენობის გადახდა დაეკისრათ, ხოლო ერთ შემთხვევაში დეკლარირებას დაქვემდებარებული თანხა მოქალაქეს სრულად ჩამოერთვა და მას სანქციის სახით ჯარიმა 581.489 ლარი შეეფარდა.