კომპანია „საირმის“ გაფიცულმა თანამშრომლებმა ხელისუფლებას ულტიმატუმი წაუყენეს

თბილისი, 26 თებერვალი - Sputnik. მინერალური წყლის კომპანია „საირმის" (შპს "საირმე მინერალ ვოთერსის") ქარხნის თანამშრომლები ხელისუფლების წარმომადგენლებთან შეხვედრას და მათ პროცესში ჩართვას ითხოვენ.

„საირმის“ თანამშრომლები 13 თებერვალს გაიფიცნენ. ისინი ღირსეულ და უსაფრთხო სამუშაო პირობებსa და ხელფასების 30%-ით მომატებას ითხოვენ. მათი თქმით, ქარხანაში არის ანტისანიტარია, გაყვანილობასთან დაკავშირებული პრობლემები, არ არის გათბობა.

აგრომეურნეობის, ვაჭრობისა და მრეწველობის პროფკავშირ „ლაბორის“ თავმჯდომარე გიორგი დიასამიძის განცხადებით, თუ პროცესში ხელისუფლების წარმომადგენლები არ ჩაერთვებიან, ისინი პროტესტის უკიდურეს ფორმას მიმართავენ და საირმე-აბასთუმნის მთავარ მაგისტრალს გადაკეტავენ. გაფიცულებმა ხელისუფლებას 1-საათიანი ვადა მისცეს.

გაფიცულებს დღეს სოლიდარობა სხვადასხვა საწარმოს, მათ შორის კომპანია „ბორჯომის“ თანამშრომლებმაც გამოუცხადეს.

შპს „საირმე მინერალ ვოტერსი“ „საირმის“ ბრენდით აწარმოებს გაზიან მინერალურ და არაგაზირებულ წყაროს წყალს, ასევე არაგაზირებულ წყაროს წყალს „ნაკადულს“. კომპანიის ვებ-გვერდზე ნათქვამია, რომ კომპანიის პროდუქციის ექსპორტი 17 ქვეყანაში ხორციელდება.

„საირმის“ მინერალური წყლის პირველი ქარხანა 1944 წელს გაიხსნა.