თბილისი, 20 თებერვალი — Sputnik. აშშ-ის პრეზიდენტმა ჯო ბაიდენმა, რომელიც დღეს გამოუცხადებელი ვიზიტით ეწვია უკრაინის დედაქალაქს, პირველი კომენტარები გააკეთა ვიზიტთან დაკავშირებით, რომლებიც მის ოფიციალურ Twitter-აკაუნტზე ქვეყნდება.
„ახლოვდება რუსეთის უკრაინაში სასტიკი შეჭრის წლისთავი. და დღეს მე კიევში ვარ, რათა პრეზიდენტ ზელენსკის შევხვდე და დავუდასტურო ჩვენი ურყევი მხარდაჭერა უკრაინის დემოკრატიის, სუვერენიტეტისა და ტერიტორიული მთლიანობის მიმართ“, — ნათქვამია ამერიკის ლიდერის ტვიტში.
ბაიდენის თქმით, ერთი წლის წინ, როდესაც კონფლიქტი დაიწყო, რუსეთის პრეზიდენტი ფიქრობდა, რომ „უკრაინა სუსტია, ხოლო დასავლეთი — გაყოფილი; ფიქრობდა, რომ დაგვჯაბნიდა, მაგრამ შეცდა“.
აშშ-ის პრეზიდენტის თქმით, შეერთებული შტატები სამხედრო დახმარების ახალ, 500-მილიონიან პაკეტს გამოუყოფს უკრაინას.