თბილისი, 18 თებერვალი - Sputnik. ტრიესტის ჯუზეპე ტარტინის სახელობის სახელმწიფო კონსერვატორია (იტალია) თბილისის ვანო სარაჯიშვილის სახელობის სახელმწიფო კონსერვატორიის ევროპელი პარტნიორი გახდა.
„თბილისის ვანო სარაჯიშვილის სახელობის სახელმწიფო კონსერვატორია თანამშრომლობის შეთანხმება გააფორმა იტალიაში, ჯუზეპე ტარტინის სახელობის სახელმწიფო კონსერვატორიასთან ტრიესტში“, - ნათქვამია კონსერვატორიის განცხადებაში.
აღნიშნულია, რომ ტარტინის სახელობის სახელმწიფო კონსერვატორია ტრიესტში ევროპის კონსერვატორიების ასოციაციის წევრია.
ტრიესტის სახელმწიფო კონსერვატორია, რომელიც 1872 წელს დაარსდა, არის ერთ-ერთი ყველაზე პრესტიჟული მუსიკალური სკოლა იტალიაში. კონსერვატორია ცნობილი იტალიელი კომპოზიტორისა და მევიოლინის, ჯუზეპე ტარტინის სახელს ატარებს.
კონსერვატორია სთავაზობს სამუსიკო კურსების ფართო არჩევანს კლასიკიდან ჯაზამდე და ცნობილია თავისი მაღალი ხარისხის სწავლებითა და კვლევებით. მის ბინადრებს შორის არის მრავალი ცნობილი მუსიკოსი, მათ შორის ლუჩიანო პავაროტი, კლაუდიო აბადო და რიკარდო მუტი.
წელს თბილისის კონსერვატორიის პარტნიორები გახდნენ მოლდოვას მუსიკის, თეატრისა და სახვითი ხელოვნების აკადემია და შტუტგარტის მუსიკისა და საშემსრულებლო ხელოვნების სახელმწიფო უნივერსიტეტი (გერმანია).
წლების განმავლობაში თბილისის კონსერვატორიამ გააფორმა ორმხრივი თანამშრომლობის ხელშეკრულებები ისეთ უმაღლეს საგანმანათლებლო დაწესებულებებთან, როგორებიც არიან ბერლინის მუსიკისა და თეატრის სკოლა, მერი პაპერტის სამუსიკო სკოლა - დუკენის უნივერსიტეტი (აშშ), ბელარუსის სახელმწიფო მუსიკის აკადემია.
გარდა ამისა, თბილისის კონსერვატორია თანამშრომლობს ევროპის წამყვან უნივერსიტეტებთან ევროკავშირის არაკომერციული პროგრამა Erasmus-ის ფარგლებში, რომელიც ევროკავშირის წევრი ქვეყნების უნივერსიტეტებს შორის სტუდენტებისა და მასწავლებლების გაცვლას გულისხმობს.
ვანო სარაჯიშვილის სახელობის თბილისის სახელმწიფო კონსერვატორია პირველი უმაღლესი სასწავლებელია საქართველოში, გაიხსნა 1917 წლის 1 მაისს. მრავალი წლის განმავლობაში თბილისის კონსერვატორია იყო ერთადერთი ევროპული ტიპის მუსიკალური სკოლა მთელ კავკასიაში.
სკოლამ სახელმწიფო კონსერვატორიის სტატუსი 1924 წელს მიიღო. კონსერვატორიას დიდი ქართველი მომღერლის ვანო სარაჯიშვილის სახელი 1947 წელს მიენიჭა. წლების განმავლობაში თბილისის კონსერვატორიას ხელმძღვანელობდნენ ცნობილი ქართველი და რუსი მუსიკოსები.