თბილისიდან ნახევარი საათის სავალზე მდებარეობს ყოფილი მაგნიტური ობსერვატორიის შენობა
ამ ადგილიდან დიდებული ხედი იშლება
სოფლისკენ ქვაფენილი გზა მიდის. ამბობენ, რომ გზას მეორე მსოფლიო ომის დროს დატყვევებული გერმანელები აგებდნენ
ობსერვატორია 1913 წელს აშენდა. მას ხუთი პავილიონი ჰქონდა – ოთხი მიწისქვეშა და ერთი მიწისზედა
ასეთ ობსერვატორიებში შეისწავლიან, თუ როგორ იცვლება დედამიწის მაგნიტური ველი დროთა განმავლობაში
როგორც წესი, ობსერვატორიები ქალაქიდან მოშორებით შენდება, რათა თავიდან იქნას არიდებული შესაძლო შეფერხებები. 1950-იან წლებში მიწისზედა კორპუსი დაიკავა ლავრენტი ბერიამ და საკუთარ რეზიდენციად გადააკეთა
ბერიას შემდეგ შენობა გადაეცა ტუბერკულოზის დისპანსერს, რომელიც 80-იან წლებში დაიხურა, რადგან თბილისთან სიახლოვის გამო მოსახლეობის ინფიცირების საფრთხემ მოიმატა
დისპანსერის დახურვის შემდეგ შენობა მიტოვებულია, თუმცა იქ კიდევ წააწყდებით ნივთებს, რომლებიც იმაზე მეტყველებს, რომ აქ ოდესღაც საავადმყოფო იყო
პირველი სართული საშინელებათა ფილმს მოგაგონებთ
შენობაში ჩამონგრეულია მეორე სართულის იატაკი, ამიტომ ზედა სართულზე ასვლა საკმაო საფრთხის შემცველია
ზოგ კედელზე გაკრულია უცნაური პლაკატები, რაც ამ ადგილზე მისტიკის მოყვარულების სტუმრობაზე მეტყველებს
სარდაფში ჩასვლა არ ღირს - არავინ იცის, რამდენად სანდოა კედლები და შესაძლოა თუ არა შენობის ჩამონგრევა. გარდა ამისა, იქ არ არის სარკმელი, ამიტომ არაფერი ჩანს
ყოფილი გეოფიზიკური ობსერვატორიის მახლობლად მდებარეობს კიდე ერთი მიწისქვეშა პავილიონი
ის შედგება ორი მრგვალი დარბაზისგან, რომლებშიც ადრე საზომი ხელსაწყოები იყო განთავსებული
ახლა პავილიონამდე მისვლა პრობლემურია, რადგან ტერიტორია ეკუთვნის საქართველო საპატრიარქოს. აქ დგას წმინდა სამების ეკლესია, რომელიც ქალთა მონასტერს განეკუთვნება. მონასტრის მსახურებმა შესაძლოა შენიშვნა მოგცენ და ტერიტორიის დატოვება მოგთხოვონ
კარსანში სულ სამი მონასტერია - ერთი დედათა და ორი მამათა. აქ ცოტა სახლიღა შემორჩა, სამაგიეროდ უამრავია მიტოვებული და დანგრეული შენობა
ცივილიზაციამ ამ ადგილსაც არ აუარა გვერდი - ტაძართან მზის ორი ბატარეაა დადგმული
კარსანიდან ტაძრამდე ორი გზა მიდის - საფეხმავლო და საავტომობილო
გზაზე ასეთ მანიშნებელ დაფასაც შეხვდებით
შორს ასევე მოჩანს არმაზის ციხე. სურვილის შემთხვევაში იქ წასვლაც შეიძლება, თუმცა ამისათვის გარკვეული ფიზიკური მომზადებაა საჭირო
ყველაფერ ამაზე ერთი დღე სრულებით საკმარისია. მთიდან ჩამოსვლის შემდეგ შეგიძლიათ გზისპირა სასადილოებს ესტუმროთ - სოფელში არ არის მაღაზიები, ამიტომ მარაგები წასვლის წინ უნდა შეივსოთ