თბილისი, 4 დეკემბერი- Sputnik. ირანის ხელისუფლებამ მორალის პოლიცია გააუქმა, იუწყება სააგენტო Agence France-Presse ქვეყნის გენპროკურორზე დაყრდნობით.
არსებული ინფორმაციით, ეს გადაწყვეტილება მიღებულია საპროტესტო ტალღის ფონზე, რამაც მთელს ქვეყანაში 22 წლის მაჰსა ამინის გარდაცვალების შემდეგ იფეთქა.
ირანის შსს-ს მონაცემებით, ამ არეულობებში სულ მცირე 200 ადამიანი დაიღუპა. საჯარო, საზოგადოებრივმა და კერძო ორგანიზაციებს 200 მლნ დოლარზე მეტი ზარალი მიადგა.
„ირანის გენერალურმა პროკურორმა მოჰამედ ჯაფარ მონთაზერიმ განაცხადა, რომ მორალის პოლიცია გააუქმეს კომპეტენტურმა ორგანოებმა“, იტყობინება France-Presse სააგენტო ISNA-ზე დაყრდნობით. გენერალური პროკურორის თქმით, მას „არანაირი კავშირი არ ჰქონდა სასამართლო სისტემასთან“.
სექტემბრის შუა რიცხვებიდან ირანში მასობრივი არეულობები და საპროტესტო აქციები იმართება მაჰსა ამინის გარდაცვალებასთან დაკავშირებით, რომელიც მორალის პოლიციამ დააკავა. ქვეყნის მოსახლეობა ხელისუფლებას მაჰსას სიკვდილში ადანაშაულებს. ირანელმა ქალებმა სოციალურ ქსელებში მასიურად დაიწყეს ვიდეოების გამოქვეყნება, რომლებშიც თმას იჭრიდნენ და ჰიჯაბს წვავდნენ.
ირანის ხელისუფლება მომიტინგეების მხარდაჭერაში დასავლეთის ქვეყნებს ადანაშაულებს, რომლებიც თავიანთ მედიაში ავრცელებენ დივერსიულ, ანტიირანულ გზავნილებს და ასევე მოუწოდებენ ირანის მოსახლეობას რევოლუციური ღონისძიებებისა და ხელისუფლების დამხობისკენ.
სამართალდამცავი ორგანოები ახორციელებენ დასავლეთის ქვეყნების, ისრაელისა და საუდის არაბეთის სადაზვერვო სამსახურების მიერ „დავერბოვკებულ“ პირთა მასობრივ დაკავებას, საზღვრებზე თითქმის ყოველდღიურად ხდება დიდი რაოდენობით იარაღის ამოღება, რომლებიც განკუთვნილია არეულობის მონაწილეებისთვის.