თბილისი, 22 ნოემბერი - Sputnik. ეს არის პირდაპირი თავდასხმა ქართველი ხალხის მიერ არჩეულ ხელისუფლებაზე, განაცხადა პარლამენტის თავმჯდომარე შალვა პაპუაშვილმა ჯორჯ ბუშის ინსტიტუტის გლობალური პოლიტიკის დირექტორის, დევიდ კრამერის განცხადებაზე საპასუხოდ.
კრამერმა ტელეარხ „ფორმულასთან“ ინტერვიუში განაცხადა, რომ აუცილებელია სანქციების დაწესება იმ პირების წინააღმდეგ, „რომლებიც საქართველოს არასწორი მიმართულებით მიუძღვებიან“.
„ეს არის პირდაპირი თავდასხმა ქართველი ხალხის მიერ არჩეულ ხელისუფლებაზე. ვინც თავს ესხმის ხალხის მიერ არჩეულ ხელისუფლებას, ვერ იქნება ქართველი ხალხის მეგობარი“, - განაცხადა შალვა პაპუაშვილმა.
ამასთან მან აღნიშნა, რომ მსგავსი გამონათქვამების უკან დგას ქართული ოპოზიციის რადიკალური ნაწილი, რომელსაც ხელისუფლების დასუსტება სურს.
„ოპოზიციის რადიკალურ ნაწილს და მათ მხარდამჭერებს ქვეყნის შიგნით, თუ გარეთ, საქართველოს ევროპული მომავალი მძევლად ჰყავთ აყვანილი და ცდილობენ, მძევლად აყვანის სანაცვლოდ გამოივაჭრონ საქართველოს ხელისუფლების დასუსტება“, - განაცხადა პაპუაშვილმა.
ამასთან მან აღნიშნა, რომ ოპოზიციის ერთადერთი სურვილია ხელისუფლების არადემოკრატიული გზით შეცვლაა, რადგან არჩევნების მოგების შანსი მათ არ აქვთ.