თბილისი, 16 ნოემბერი — Sputnik. დონალდ ტრამპმა აშშ-ის ფედერალურ საარჩევნო კომისიას მომდევნო საპრეზიდენტო არჩევნებში მონაწილეობის შესახებ განაცხადი წარუდგინა, რის შემდეგაც მხარდამჭერებს შეხვდა.
„ამერიკისთვის დიდების დასაბრუნებლად, დღეს საკუთარი კანდიდატურა წამოვაყენე აშშ-ის პრეზიდენტის პოსტზე. <...> მე ვიბრძოლებ ისე, როგორც არავის უბრძოლია ჩემამდე. ჩვენ დავამარცხებთ რადიკალ დემოკრატებს და შევაჩერებთ ჩვენი ქვეყნის რღვევას“, — მიმართა ტრამპმა მარ-ე-ლაგოს რეზიდენციაში შეკრებილ მხარდამჭერებს.
მისი თქმით, ამ დროისათვის შეერთებული შტატები „საშინელ მდგომარეობაშია“, რაშიც ბრალი ჯო ბაიდენსა და დემოკრატებს მიუძღვით.
მომდევნო საპრეზიდენტო არჩევნები აშშ-ში 2024 წელს ჩატარდება. აქამდე ქვეყნის ისტორიაში ერთადერთი პრეზიდენტი, რომელიც მეორედ აირჩიეს ოთხწლიანი პაუზის შემდეგ, გროვერ კლივლენდი იყო. ეს 1893 წელს მოხდა.