ტოჩინოშინმა ტურნირი წაგებით დაიწყო - მსაჯებმა გადაწყვეტილება ქართველის წინააღმდეგ მიიღეს

თბილისი, 13 ნოემბერი – Sputnik. ქართველმა სუმოისტმა ლევან გორგაძემ, იგივე ტოჩინოშინმა 99-ე ბაშო დასანანი წაგებით დაიწყო.

იაპონიაში წლის ბოლო, ნოემბრის ბაშო დაიწყო, რომელიც 15 დღეს გაგრძელდება. ლევან გორგაძე ტურნირზე დასავლეთის მერვე მაეგაშირას რანგშია განთესილი. კიუშუ ბაშო გაიმართება ქალაქ ფუკუოკას საერთაშორისო ცენტრში 13-დან 27 ნოემბრამდე.

ტურნირის პირველ დღეს ტოჩინოშინის მეტოქე აღმოსავლეთის მეცხრე მაეგაშირა ტაკანოსიო იყო. გორგაძემ მეტოქე დოჰიოდან გაიყვანა, მაგრამ დამატებითმა მსაჯებმა ჩათვალეს, რომ ტოჩინოშინმა დოჰიო ტაკანოსიოზე ადრე დატოვა და, შესაბამისად, მას წაგება ჩაუთვალეს.

ტოჩინოშინი მომდევნო მატჩს გამართავს ხვალ, მისი მეტოქე დასავლეთის მეშვიდე მაეგაშირა იქნება.

წამყვანი მოჭიდავეების რეიტინგში პოზიციის გასაუმჯობესებლად 35 წლის ტოჩინოშინს ტურნირის დადებითი ბალანსით დასრულება სჭირდება. სექტემბრის ტურნირის შემდეგ ქართველმა სუმოისტმა თავისი პოზიცია დასავლეთის მერვე მაეგაშირამდე გაიუმჯობესა.