„ვაკუუმი“ - თბილისის ეროვნულ გალერეაში კოკა რამიშვილის გამოფენა გაიხსნა

თბილისი, 11 ნოემბერი — Sputnik. დიმიტრი შევარდნაძის სახელობის ეროვნულ გალერეაში ქართველი მხატვრის კოკა რამიშვილის ნამუშევრების გამოფენა „ვაკუუმი“ გაიხსნა, ნათქვამია საქართველოს კულტურის, სპორტისა და ახალგაზრდობის სამინისტროს განცხადებაში.

„ვაკუუმი“ რთულ, უხილავ ფსიქოემოციურ აქცენტებზე აგებული ექსპოზიციაა.

მიუხედავად იმისა, რომ გამოფენაში ახალ ნამუშევრებთან ერთად წინა წლებში განხორციელებული რამდენიმე პროექტის მოტივი იყრის თავს, ის არ გულისხმობს რეტროსპექტულ ფორმატს.

როგორც თავად ავტორი ამბობს, ამ გამოფენაზე მუშაობისას განსაკუთრებით მნიშვნელოვანი იყო ინტიმურობის ატმოსფეროს შექმნა, რაც განსაკუთრებით მძაფრად გადმოიცა ვიდეოინსტალაციაში „ადამიანები სიყვარულის განცდისას".

კოკა რამიშვილი უახლესი ქართული ხელოვნების მნიშვნელოვანი წარმომადგენელია. როგორც კულტურის სამინისტროში აღნიშნავენ, მისი შემოქმედება „პოსტსაბჭოთა პერიოდის ურთულესი ძვრების ფონზე ჩამოყალიბდა და თავიდანვე გამოირჩეოდა რეფლექსურობით, რთული კონტექსტის შესატყვისი ფორმებისა და მათი შესაბამისი მედიუმების ზუსტი შერჩევით“.

„ის მკვლევარი მხატვარია და ყოველთვის ორიგინალურ კავშირებს პოულობს კონკრეტულ პრობლემასა და აბსტრაგირებულ მსჯელობას შორის“, – აღნიშნულია განცხადებაში.

Window Project-ის მიერ ორგანიზებული გამოფენა 2022 წლის 2 დეკემბრის ჩათვლით გაგრძელდება.